Mae miloedd wedi arwyddo deiseb yn erbyn adeiladu tai ar faes parcio tref ar lan y môr yng Ngheredigion.

Mae dros 2,500 wedi arwyddo’r ddeiseb i wrthwynebu adeiladu 30 o dai ar faes parcio wrth ganol Cei Newydd.

Mae swyddogion cyngor y dref wedi argymell rhoi caniatâd cynllunio i’r cynllun £7.5m i adeiladu tai fforddiadwy ar y maes parcio sydd mewn dwylo preifat.

Ar hyn o bryd mae'r safle'n gweithredu fel maes parcio talu ac arddangos, sy'n eiddo i gwmni Barcud ac yn cael ei reoli ganddyn nhw fel menter fasnachol.

Mae’r rheini sydd wedi gwrthwynebu’r cais, gan gynnwys y Cyngor Tref, wedi codi pryderon am golli mannau parcio a’i effaith ar y diwydiant twristiaeth, a diffyg trafnidiaeth gyhoeddus yn y dref ar gyfer trigolion.

Mae disgwyl y byddai 98 o bobl ychwanegol yn byw yn y tai. 

Mae’r cais cynllunio yn cynnwys cadw 91 o’r mannau parcio ar y safle - ac fe allai'r mannau parcio gael eu cadw “am byth” meddai swyddogion pe bai’r cynllun yn cael ei gymeradwyo.

Mae’r cais wedi ei ohirio ddwywaith, ym mis Chwefror a mis Mawrth er mwyn asesu tystiolaeth ychwanegol gan y rheini oedd wedi codi pryderon am y datblygiad.

Image

'Colli swyddi'

Mae Cymdeithas Masnachwyr Cei Newydd wedi creu deiseb ar-lein ac wedi gosod arwyddion cod QR o amgylch y dref yn annog pobl i arwyddo.

“Mae'r maes parcio yn ganolog i'n heconomi leol a bydd ei golli yn arwain at ostyngiad sylweddol mewn ymwelwyr a thwristiaid,” medden nhw.

“Mae'n syml - bydd llai o barcio yn arwain at lai o ymwelwyr.

“Bydd llai o ymwelwyr yn effeithio ar ein heconomi ac yn achosi colli swyddi. 

“Nid yn unig y bydd hyn yn effeithio ar dwf economaidd ond hefyd yn achosi tagfeydd traffig yn lleol a llai o leoedd parcio i drigolion lleol.”

Argymhellir y cais eto i'w gymeradwyo yng nghyfarfod pwyllgor rheoli datblygu Cyngor Sir Ceredigion ar 14 Mai.

Dywedodd adroddiad swyddogion y cyngor mai “dyfalu” oedd dweud y bydd y datblygiad yn effeithio ar “hyfywedd a bywiogrwydd y dref gyfan”.

“Cei Newydd yw’r dref gyda’r mwyaf o ail dai a thai rent tymor byr yn y sir a gallai ychwanegu 98 o drigolion parhaol at ganol y dref gyflwyno manteision economaidd sylweddol.”