Bydd penderfyniad dros ganiatáu cynllun ynni hydro dadleuol yn Eryri yn cael ei wneud gan Lywodraeth Cymru.

Mae'r brodyr Elis Dafydd, Moi Dafydd a Dafydd Elis, o'r Bala, yn ceisio caniatâd cynllunio ar gyfer y cynllun 600 cilowat ar Afon Cynfal ger Llan Ffestiniog. 

Yn ôl y brodyr, sy'n ffermio yn yr ardal, byddai'r cynllun yn darparu digon o drydan ar gyfer 700 o gartrefi ac yn helpu i gyrraedd targedau net sero.

Cafodd y cais ei gyflwyno gyntaf yn 2024, ac roedd eu hail gais i fod i gael ei ystyried gan bwyllgor cynllunio Awdurdod Parc Cenedlaethol Eryri ym mis Ionawr.

Er i gynlluniau'r gorffennol fethu â dwyn ffrwyth, roedd swyddogion cynllunio'r Parc Cenedlaethol wedi argymell caniatáu'r cynllun.

Ond roedd y cynllun wedi wynebu gwrthwynebiad cryf ar sail amgylcheddol a'r effaith y bydd yn ei gael ar Bont yr Afon Gam a Rhaeadr y Cwm.

Cyn y cyfarfod cynllunio ym mis Ionawr, roedd 592 o ymatebion wedi dod i law - 453 ohonynt yn gwrthwynebu'r cynllun. 

Ymhlith y gwrthwynebwyr roedd Cymdeithas Parc Eryri a'r sefydliad Save Our Rivers.

O'r 139 oedd yn cefnogi'r cynllun, roedd y mwyafrif yn honni na fyddai'r datblygiad yn rhy amlwg, ac y byddai'n cyfrannu at gynlluniau ynni gwyrdd y llywodraeth ac yn helpu tirfeddianwyr i arallgyfeirio eu hincwm.

Yn y cyfarfod roedd swyddogion wedi gofyn am ohirio'r mater oherwydd bod angen ystyried 900 o ymatebion hwyr.

Daeth i'r amlwg yn ddiweddarach fod Llywodraeth Cymru wedi oedi'r cais er mwyn ystyried a ddylai gweinidogion wneud penderfyniad.

Ond mae adroddiad i bwyllgor cynllunio'r Parc Cenedlaethol yr wythnos nesaf yn datgelu bod y pederfyniad bellach yn cael ei wneud gan weinidogion, er nad oes rheswm wedi'i roi dros hynny.