Mae'r holl docynnau ar gyfer sioeau Oasis wedi gwerthu allan er gwaethaf problemau gyda gwefannau 

Roedd problemau gyda gwefannau tocynnau wedi effeithio ar ymdrechion ffans Oasis oedd yn ceisio prynu tocynnau i weld cyngherddau'r band.

Fe wnaeth y band gadarnhau ddydd Mawrth eu bod yn ail ffurfio, gan gyhoeddi taith ym Mhrydain ac Iwerddon. Bydd dau gyngerdd cyntaf y daith yn cael eu cynnal yn Stadiwm Principality, Caerdydd.

Cafodd tocynnau i'r sioeau eu rhyddhau fore Sadwrn, gyda thocynnau i ddwy sioe yn Nulyn yn cael eu rhyddhau am 08.00, tra bod tocynnau i'w sioeau yn y DU wedi'u rhyddhau am 09.00.

Ond mae unigolion sydd yn ceisio am y tocynnau wedi profi problemau, yn dilyn "methiannau" yn y gwefannau sydd yn eu gwerthu.

Mae rhai unigolion wedi adrodd eu bod wedi eu "tynnu allan" o'r ciw am docynnau ar wefan Ticketmaster a'u gorfodi i ail-ddechrau eu ceisiadau, wrth gael eu symud yn ôl i gefn y ciw.

Fe wnaeth y gwefan Gigs and Tours, sy'n cael ei redeg gan gwmni hyrwyddo SJM Concerts, profi problemau cyn 09.00.

Dywedodd neges ar y wefan: “Plîs byddwch yn amyneddgar. Ar hyn o bryd mae llawer o bobl ar y safle yn chwilio am docynnau, felly rydym wedi rhoi system giwio ar waith, sy'n gwbl normal."

Dywedodd Ticketmaster nad oedd eu gwefan wedi methu.

“Mae’r ciw yn symud ymlaen wrth i gefnogwyr brynu tocynnau. Fel y rhagwelwyd, mae miliynau o gefnogwyr yn ymweld â'n gwefan felly wedi cael eu gosod mewn ciw," medd llefarydd.

Rhybudd

Llwyddodd nifer cyfyngedig o gefnogwyr i brynu'r tocynnau cyntaf yn ystod ffenestr tair awr nos Wener.

Yn fuan wedyn, roedd tocynnau yn cael eu rhestru ar-lein am fwy na £6,000 - tua 40 gwaith gwerth y tocyn gwreiddiol.

Mae Oasis yn annog pobl i beidio ag ailwerthu tocynnau am brisiau uwch ar wefannau nad ydynt yn gysylltiedig â'u hyrwyddwr, a dywedodd y band y byddent yn cael eu "canslo".

Mae Adam Webb, rheolwr ymgyrch y FanFair Alliance, a sefydlwyd i helpu cwsmeriaid ac artistiaid i fynd i'r afael â mater towtio tocynnau, ar weinidogion i weithredu.

Inline Tweet: https://twitter.com/oasis/status/1829600868183785917

Dywedodd: “Rydyn ni angen rhywfaint o weithredu gan y llywodraeth.”

"Gwnaeth Syr Keir Starmer gyhoeddiad ym mis Mawrth, gan awgrymu y byddai Llafur - pe baent yn dod i rym - yn capio'r pris ailwerthu. Mae hynny'n rhywbeth yr ydym yn gobeithio y byddant yn symud ymlaen ag ef."

Yn yr araith honno, dywedodd y prif weinidog na allai mynediad i ddiwylliant fod "ar drugaredd towts tocyn didostur sy'n codi'r prisiau".

Yn fuan ar ôl i'r cyn-werthu ddydd Gwener ddechrau, ymddangosodd rhestrau tocynnau ar wefannau ailwerthu fel StubHub a Viagogo, gan gynnwys:

- Rhwng £916 a £4,519 ar gyfer cyngerdd cyntaf y daith yn Stadiwm Principality Caerdydd ar 4 Gorffennaf

- £6,000 ar gyfer sioe Oasis yn Stadiwm Wembley yn Llundain ar 26 Gorffennaf

- Dros £4,000 ar gyfer tocynnau sefyll yn Stadiwm Murrayfield yng Nghaeredin ar 12 Awst

- Mwy na £2,500 ar gyfer cyngerdd y band yn dod adref yn Heaton Park ym Manceinion ar 12 Gorffennaf

Cyn y cyn-werthiant, dywedodd hyrwyddwyr y bydd tocynnau sefyll yn costio tua £150, tra bod tocynnau seddi safonol yn amrywio o £73 i tua £205. 

Mae prisiau pecynnau premiwm swyddogol yn codi i £506.

Mae disgwyl i tua 1.4 miliwn o docynnau fod ar gael ar gyfer yr 17 cyngerdd awyr agored yn y DU ac Iwerddon fis Gorffennaf ac Awst nesaf.