Mae menyw wedi ei harestio yn dilyn marwolaeth "amheus" bachgen chwech oed yn Abertawe.

Cafodd y gwasanaethau brys eu galw i dŷ yng Nghlos Cwm Du am 20:30 nos Iau.

Mae menyw 41 oed wedi cael ei harestio ar amheuaeth o lofruddiaeth ac mae hi'n cael ei chadw yn y ddalfa ym Mhen-y-bont ar Ogwr.

Dywedodd Heddlu De Cymru bod y fenyw a'r plentyn yn byw gyda'i gilydd.

Nid yw'r llu yn chwilio am unrhyw un arall mewn cysylltiad â'r farwolaeth.

Dywedodd y Prif Uwch-arolygydd Chris Truscott, rheolwr rhanbarthol Abertawe a Chastell-nedd Port Talbot: “Mae hwn yn ddigwyddiad trallodus a fydd yn sioc i’r gymuned leol.

“Mae ditectifs yn gweithio i sefydlu amgylchiadau marwolaeth y plentyn a bydd presenoldeb heddlu yn yr ardal i roi sicrwydd i drigolion lleol.

“Nid yw dyfalu ar gyfryngau cymdeithasol yn ddefnyddiol a bydd yn achosi trallod i’r rhai yr effeithiwyd arnynt gan y digwyddiad hwn ar adeg sydd eisoes yn anodd.”