Dynes 96 oed yn cyfaddef iddi achosi marwolaeth drwy yrru'n beryglus
27/08/2024
Mae dynes 96 oed wedi cyfaddef iddi achosi marwolaeth drwy yrru'n beryglus, ar ôl iddi yrru dros balmant a tharo dau berson a oedd yn cerdded.
Tra'n eistedd mewn cadair olwyn yn Llys y Goron Lerpwl, plediodd June Mills o Ainsdale ar Lannau Mersi yn euog.
Roedd ei gŵr wrth ei hymyl yn y llys.
Cyfaddefodd iddi achosi marwolaeth Brenda Joyce, 76, yn Formby ar 2 Awst y llynedd.
Ar ran yr amddiffyniad, dywedodd Tom Gent na all Mills gerdded yn bell ac felly byddai'n anhebygol y medrai gyflawni gwaith di dâl.
Dywedodd bod ei gallu i symud wedi gwaethygu ers y gwrthdrawiad.
Clywodd y llys iddi wasgu gormod ar y sbardun tra roedd yn gyrru ei char Vauxhall Corsa.
Cafodd yr achos ei ohirio, a bydd June Mills yn cael ei dedfrydu mewn gwrandawiad ar 30 Medi.
Wedi'r gwrthdrawiad fis Awst y llynedd, dywedodd Heddlu Glannau Mersi fod dynes 76 oed wedi marw yn y fan a'r lle, wedi iddi gael anafiadau difrifol i'w phen.
Cafodd dynes arall 80 oed a oedd yn cerdded ar y palmant, fân anafiadau.
