Fe fydd ffatri yn Sir y Fflint yn cau ei drysau am y tro olaf y flwyddyn nesaf gan arwain at dros 300 o ddiswyddiadau medd yr undeb sydd yn cynrychioli'r gweithwyr yno.

Roedd cwmni Kimberly Clark wedi ymgynghori ar gau'r safle yn gynharach yn yr haf.

Mae'r ffatri'n cynhyrchu cadachau gwlyb, ac fe ddywedodd y cwmni bod gwaharddiad Llywodraeth y DU ar ddeunyddiau plastig untro wedi ei gwneud yn amhosib i'r ffatri barhau ar agor.

Y gred yw bod dros 200 o weithwyr yn gweithio ar y safle a 100 arall yn gweithio yn y gadwyn gyflenwi'n lleol.

Wrth ymateb i'r newyddion, dywedodd Ysgrifennydd Cyffredinol Unite, Sharon Graham: "Byddai cau'r ddwy felin Kimberly Clark yn ergyd drychinebus i economi a chymunedau lleol y Fflint a gogledd Cymru yn gyffredinol. 

"Mae ein haelodau wedi'u dryllio ac fe fydd yr effaith ar yr ardal leol yn drychinebus.

"Bydd Unite yn brwydro i wrthdroi’r penderfyniad hwn ac yn galw ar y llywodraeth i ymyrryd i geisio achub y swyddi hanfodol hyn."