Mae’r Swyddfa Dywydd wedi cyhoeddi rhybudd melyn i rannau o Gymru ar ddydd Nadolig, gan ddweud y gallai achosi toriadau trydan.

Dywedodd llefarydd ar ran y Swyddfa Dywydd y bydd gwyntoedd chwyrn o'r dwyrain i'r gogledd-ddwyrain ar Ddydd Nadolig yn arwain at rywfaint o aflonyddwch.

Mae gwyntoedd o 55-65 mya yn bosib mewn rhai ardaloedd, meddai.

“O ystyried cyfeiriad anarferol y gwynt, gallai hyn arwain at rywfaint o darfu ar drafnidiaeth a chyflenwadau ynni,” medden nhw. 

“Bydd tonnau mawr yn berygl ychwanegol ar rai arfordiroedd.”

Does dim disgwyl Nadolig gwyn eleni ond fe allai fod yn oer, gyda'r tymheredd yn syrthio i -4 gradd Celsiws mewn rhannau gwledig o Gymru.

Bydd y rhybudd yn effeithio ar y siroedd canlynol:

• Blaenau Gwent
• Pen-y-bont ar Ogwr
• Caerffili
• Caerdydd
• Sir Gaerfyrddin
• Ceredigion
• Conwy
• Gwynedd
• Ynys Môn
• Merthyr Tudful
• Sir Fynwy
• Castell-nedd Port Talbot
• Casnewydd
• Powys
• Rhondda Cynon Taf
• Abertawe
• Torfaen
• Bro Morgannwg