Mae’r rhai sydd â chyllyll zombie a machetes yn eu meddiant yn cael eu hannog i’w rhoi i orsafoedd heddlu cyn i waharddiad ar yr arfau gael ei gyflwyno fis nesaf.

Dywedodd Llywodraeth Prydain na fydd unrhyw erlyniad o’r rhai sy’n ildio’r cyllyll yn ddiogel.

O 24 Medi, bydd cyllyll zombie a machetes yn cael eu hychwanegu at restr waharddedig o eitemau peryglus yng Nghymru a Lloegr.

Ar hyn o bryd, nid yw'r Llywodraeth wedi cyhoeddi gwaharddiad ar gleddyfau ninja.

Ond dywedodd y Gweinidog Plismona, y Fonesig Diana, fod Llywodraeth y DU yn bwriadu gwneud y rhain yn anghyfreithlon yn y dyfodol. 

Mae'r cynllun pedair wythnos yn rhan o gynllun ehangach i haneru'r nifer o droseddau â chyllyll o fewn y 10 mlynedd nesaf.

Bydd yn rhedeg rhwng 26 Awst a 23 Medi mewn gorsafoedd heddlu ar draws Cymru a Lloegr.

'Gwneud y peth iawn'

Dywedodd y Fonesig Diana: “Mae gan ormod o bobl fynediad at arfau a all arwain at ganlyniadau dinistriol sy’n newid bywydau.

“Nid oes angen cyfreithlon i arf o’r math hwn fod yn ein cartrefi nac ar ein strydoedd. Dyna pam y byddwn yn parhau i wneud yn siŵr bod y cyfyngiadau llymaf ar waith i gyfyngu ar argaeledd yr arfau angheuol hyn.

“Dim ond y cam cyntaf yn ein cynllun uchelgeisiol, ymroddedig i haneru'r nifer o droseddau â chyllyll o fewn degawd yw cyflwyno gwaharddiad ar gyllyll zombie, a bydd hyn yn cael ei ddilyn yn agos gan wneud cleddyfau ninja yn anghyfreithlon.

“Mae’n gwbl hanfodol bod aelodau’r cyhoedd yn dod ymlaen ac yn rhoi’r arfau hyn i mewn yn ddiogel. Rydyn ni’n cynnig cyfle i bobl wneud y peth iawn – i helpu i wneud ein strydoedd yn fwy diogel, i atal mwy o fywydau rhag cael eu colli ac i achub dyfodol cymaint o bobl.

“Ni allwn wneud hyn ar ein pennau ein hunain, mae'n rhaid i arweinwyr gwleidyddol, plismona a chymunedol gydweithio i ddod â’r epidemig troseddau cyllyll i ben a chynnig dyfodol gwell i’n pobl ifanc.”

Mae unigolion yn cael eu hannog i gysylltu â'u gorsaf heddlu yn gyntaf i gael cyngor ar sut i bacio unrhyw arfau cyn dod â nhw i'r orsaf.

Gallant hefyd gael gwared ar arfau yn ddienw gan ddefnyddio biniau ildio, trwy gysylltu â'u heddlu lleol, y cyngor neu elusen sy'n erbyn troseddau â chyllyll.

Dywedodd y Llywodraeth y bydd unrhyw un sy'n cael ei ddarganfod gyda chyllell zombie neu machete yn dilyn y gwaharddiad yn wynebu amser yn y carchar.