Mae mam merch 13 oed a fu farw ar ôl cael adwaith difrifol i siocled poeth mewn cangen o Costa wedi dweud na ddylai hyfforddiant diogelwch alergedd bwyd gael ei drin fel “ymarferiad ticio blychau”, ar ôl i grwner ddod i’r casgliad ei bod wedi marw yn dilyn “methiant staff” i ddilyn prosesau.

Bu farw Hannah Jacobs, oedd ag alergedd i gynnyrch llaeth, o fewn oriau ar ôl cymryd un llymaid o’r ddiod ar 8 Chwefror 2023, clywodd Llys Crwner Dwyrain Llundain.

Clywodd y cwest fod gan y ferch ysgol, o Barking, dwyrain Llundain, alergedd i bysgod ac wyau ac fe ddioddefodd “adwaith ar unwaith” ar ôl un llymaid o’r siocled poeth a oedd i fod i gael ei wneud â llaeth soia.

Ddydd Gwener, daeth y cwest i’r casgliad bod Hannah wedi marw ar ôl “methiant i ddilyn y prosesau sydd mewn lle i drafod alergeddau”, a “methiant cyfathrebu” rhwng staff y siop goffi a mam Hannah, Abimbola Duyile.

'Prosesau'

Dywedodd y crwner cynorthwyol, Dr Shirley Radcliffe: “Gwraidd y farwolaeth hon yw methiant i ddilyn y prosesau sydd ar waith i drafod alergeddau ynghyd â methiant cyfathrebu rhwng y fam a’r barista.”

Darllenodd aelod o dîm cyfreithiol Ms Duyile ddatganiad y tu allan i Lys Crwner Dwyrain Llundain ar ei rhan, gan ddweud: “Ar ôl clywed yr holl dystiolaeth dros yr wythnos ddiwethaf, mae’n amlwg i mi, er ei bod yn ofynnol i’r diwydiant gwasanaeth bwyd a gweithwyr meddygol proffesiynol gael hyfforddiant alergedd, nid yw'r hyfforddiant yn cael ei gymryd yn ddigon difrifol.

“Mae gwir angen gwell ymwybyddiaeth yn y diwydiannau hyn ac ar draws cymdeithas o symptomau anaffylacsis.

“Nid yw caniatáu i bobl sy’n gweini bwyd a diod ailsefyll prawf hyfforddi alergedd 20 gwaith yn dderbyniol.

“Nid yw trin hyfforddiant alergedd fel ymarfer ticio blychau yn dderbyniol, nid yw bod yn weithiwr meddygol proffesiynol a pheidio ag ymateb yn gyflym i hyd yn oed adwaith anaffylactig posibl yn dderbyniol, a chanlyniad hyn oll yw nad yw fy merch yma bellach.”

Llun: PA