Mae teulu dyn a fu farw yn Llanelwy, Sir Ddinbych, ddydd Nadolig wedi rhoi teyrnged iddo. 

Roedd Harry Turner yn 68 oed ac yn byw yn Llanelwy. 

Dywedodd ei deulu: "Roedd Harry Turner yn un o chwech, ac wedi iddo adael yr ysgol, fe ymunodd â'r Llynges cyn gweithio yn Llundain, Iwerddon ac yn ei dref enedigol, y Rhyl. 

“Bydd colled fawr ar ôl Harry gan ei deulu."

Mae dyn 66 oed wedi ymddangos yn y llys ar gyhuddiad o lofruddio Mr Turner. 

Fe ymddangosodd James Ronald Hughes o Lanelwy yn Llys Ynadon Llandudno fore Llun.

Fe gafodd Mr Hughes ei gadw yn y ddalfa tan 31 Rhagfyr pan bydd gwrandawiad drwy gyswllt fideo yn cael ei gynnal yn Llys y Goron yr Wyddgrug. 

Fe gafodd y gwrandawiad ddydd Llun, a wnaeth bara dau funud, ei gynnal yng nghelloedd y llys yn sgil anallu Mr Hughes i symud.

Dywedodd yr erlynydd James Neary: "Oherwydd natur y cyhuddiad, mae yna gais iddo barhau yn y ddalfa. Does yna ddim hawl am fechnïaeth."

Ychwanegodd cyfreithiwr yr amddiffyniad David Jones: "Dwi wedi egluro nad oes hawl i fechnïaeth yn yr amgylchiadau yma."

Fe gafodd y gwasanaethau brys eu galw i adeilad ar Stryd Fawr Llanelwy ychydig wedi 12:00 ddydd Nadolig yn dilyn adroddiadau am aflonyddwch. 

Fe gafodd Mr Turner ei gludo i'r ysbyty ond bu farw'n ddiweddarach y diwrnod hwnnw. 

Dywedodd y Ditectif Brif Arolygydd Eleri Thomas: "Rwy’n apelio ar unrhyw un a oedd yn ardal Fflatiau’r Hen Balas ac a welodd neu a glywodd unrhyw beth cyn 12:00 i gysylltu â’r heddlu.

"Mae ein hymholiadau yn parhau, ac mae presenoldeb yr heddlu yn dal i fod yn yr ardal er mwyn tawelu meddyliau. 

"Hoffwn nodi wrth drigolion fod hwn yn ymddangos yn ddigwyddiad ynysig, ac nid ydym yn edrych am unrhyw un arall mewn cysylltiad â'r digwyddiad. 

"Gan fod cyhuddiadau bellach wedi eu hawdurdodi yn yr ymchwiliad, hoffwn bwysleisio na ddylid postio unrhyw beth ar-lein a allai fod yn niweidiol i achosion llys yn y dyfodol neu a allai danseilio’r broses cyfiawnder troseddol."

Mae'r mater hefyd wedi cael ei gyfeirio i'r Swyddfa Annibynnol ar gyfer Ymddygiad yr Heddlu (IOPC). 

Mae'r heddlu yn gofyn i unrhyw un sydd â gwybodaeth i gysylltu â nhw gan ddefnyddio'r cyfeirnod 25001050086.