Ar un adeg roedd safle hen Ysbyty Iechyd Meddwl Dinbych yn rhan bwysig o dirlun y dre.

Erbyn hyn mae'r adeilad mewn cyflwr truenus.

Ond heddiw, ar ol cael eu cymeradwyo gan Fwrdd Uchelgais Economaidd Gogledd Cymru mae'r cynlluniau i adfywio'r safle gam yn nes at eu gwireddu.

Mae'n hen amser.

Mae'r lle yn llawn o hanes.

Roedd Mam, Nain, pawb yn gweithio yne.

Bydd y buddsoddiad yma yn cefnogi'r cwmni i ddatblygu'r safle ac yn rhoi cyfleon gwaith i'r ardal sy'n hynod o bwysig.

Yn y pen draw, bydd o'n dod a tai sydd eu hangen yn yr ardal hefyd.

Mae'r prosiect yn rhan o raglen Twf Gogledd Cymru sy'n rhoi cyfleoedd ac yn mynd i'r afael a heriau sy'n gysylltiedig a safleoedd datblygu ar draws y gogledd.

O ran economi Dinbych, dw i'n meddwl bod o'n hwb enfawr.

Mae'r stryd fawr yn Dinbych, Rhuthun, lle bynnag, yn stryglo.

'Den ni angen mwy o bobl yn ein trefi i helpu'r economi yn y pen draw.

Cafodd yr adeilad tu allan i dref Dinbych ei drawsnewid i fod yn ysbyty rhwng 1844 ac 1848 ar gyfer y rheiny oedd yn byw efo problemau iechyd meddwl.

Yn 1860 cafodd y safle ei wneud yn fwy ac erbyn 1956 roedd 'na le i dros fil pum cant o gleifion.

Gyda datblygiad cyffuriau mwy effeithiol a'r drefn o drin pobl yn y gymuned cyhoeddodd yr hen Awdurdod Iechyd Clwyd ym 1987 bod y safle am gau.

Mi adawodd y claf olaf yn 1995.

Ers hynny mae'r adeilad wedi bod yn wag ac er gwaetha rhybuddion i bobl gadw draw o'r safle bu sawl achos o dresbasu a fandaliaeth dros y blynyddoedd.

Ers iddo gau mae'r adeilad wedi dirywio yn sylweddol ac er gwaethaf sawl cynllun adfywio does dim wedi dwyn ffrwyth hyd yma.

Mae'r cynllun gwerth £107 miliwn i ailddatblygu y safle 53 erw yma yn cynnwys adfer yr adeilad, adeiladu cartrefi a hefyd sefydlu mannau masnachol, gan gynnwys mannau gwyrdd, a'r gobaith yw y bydd y safle yn dod yn galon i'r gymuned unwaith eto.

Ond cymysg oedd y farn ar strydoedd Dinbych.

Sa'n neis cael rhywbeth yne, chydig o dai efo siopau hwyrach?

Wbath yn cael digwydd i'r adeilad, ond tai?

Lle mae'r bobl yma'n mynd i'r ysgol?

Gynnan nhw blant?

Lle maen nhw'n mynd i GPs a dentists a pethau ffordd 'ne?

Fydd yna'm byd yn dre 'ma iddyn nhw.

Fydd o'n llawn.

Mae 'ne lot o blant yn mynd i ddod yne.

Ysgolion, meddygfeydd. Popeth felly.

Os 'den nhw'n gwneud hynny, gret.

Ond gwnan nhw ydy'r cwestiwn.

'Swn i 'di hoffi amgueddfa i gael gweld beth oedd yn digwydd yne y blynyddoedd a fu.

Mae'r broses yn mynd yn ei blaen rwan er mwyn sicrhau'r caniatad cynllunio sydd ei angen er mwyn i'r gwaith ddechrau i ddod ag ail fywyd i'r safle adnabyddus yma ar gyrion tref Dinbych.