Mae'r graddau uchaf ar gyfer canlyniadau Safon Uwch yng Nghymru wedi gostwng am y drydedd flwyddyn yn olynol.

Roedd canran y graddau A ac A* yn 29.9% eleni, o gymharu â 34% yn 2023.

Er y gostyngiad, mae'r canlyniadau'n parhau i fod yn uwch na chyn cyfnod pandemig Covid-19, pan roedd canran y graddau A-A* yn 26.5%.

Dywedodd Cymwysterau Cymru bod “myfyrwyr yn perfformio'n dda wrth i'r drefn raddio fynd yn ôl i'r safonau cyn y pandemig”.

"Roedd trefniadau arferol cymwysterau yn ôl yn ystod y flwyddyn academaidd hon yng Nghymru, gydag asesiadau wedi eu dyfarnu yn unol â blynyddoedd cyn y pandemig, yn fras."

Inline Tweet: https://twitter.com/bryntawe/status/1823997578238669029

Roedd Lloegr wedi dychwelyd i'r un drefn ag oedd yn bodoli cyn y pandemig y llynedd.

Mae canlyniadau Safon Uwch Cymru yn dangos bod 97.4% o fyfyrwyr wedi ennill graddau A* - E. 

Enillodd 10.1% o ymgeiswyr radd A*, ac enillodd 29.9% raddau A*-A. 

Inline Tweet: https://twitter.com/Ysgol_Glantaf/status/1823995598934040733

Roedd cyfanswm y cofrestriadau am arholiadau Safon Uwch yng Nghymru eleni yn 32,235, sef gostyngiad o 2.2% o 2023 (32,960) ond roedd y cofrestriadau'n debyg i 2019 (32,320). 

Mathemateg yw'r pwnc Safon Uwch mwyaf poblogaidd o hyd, ac mae cyfradd gyffredinol bechgyn a merched yn llwyddo yn gymharol debyg gyda 96.4% o fechgyn yn ennill graddau A* - E, o gymharu â 98.1% o ferched.

Inline Tweet: https://twitter.com/ysgdyffrynconwy/status/1824003723447709887

Canlyniadau Lefel A, UG a Thystysgrif Her Sgiliau 

•  Cafodd 32,235 o raddau Safon Uwch eu dyfarnu yr haf yma  - ac fe ddyfarnwyd canlyniadau 2024 yn unol â threfniadau cyn y pandemig.

•  roedd 10.1% o'r graddau Safon Uwch a gafodd eu cyhoeddi yn radd A*, 29.9% yn A* i A ac roedd 97.4% yn raddau A* i E.  

•  ar gyfer unigolion 18 oed a gymerodd cymwysterau Safon Uwch CBAC, roedd 9.7% o'r graddau a gafodd eu cyhoeddi yn raddau A*, 29.7% yn raddau A* i A a 97.7% yn raddau A* i E 

•  cafodd 41,440 o raddau UG eu dyfarnu yr haf yma  

•  roedd 22.1% o'r graddau UG a gafodd eu cyhoeddi yn radd A a 90.2% yn raddau A i E 

•  ar gyfer unigolion 17 oed a gymerodd cymwysterau UG CBAC, roedd 22.5% o'r graddau a gafodd eu cyhoeddi yn raddau A a 89.8% yn raddau A i E 

Llongyfarchiadau

Dywedodd Cymwysterau Cymru na ddylid gwneud cymariaethau uniongyrchol rhwng y canlyniadau blynyddol diweddar o achos y gwahaniaethau yn y dulliau dyfarnu dros y pedair blynedd diwethaf.

Inline Tweet: https://twitter.com/garth_olwg/status/1823992762586353786

Wrth longyfarch y dysgwyr, dywedodd Philip Blaker, Prif Weithredwr Cymwysterau Cymru: 

“Da iawn i bawb sydd wedi cael eu canlyniadau heddiw, llongyfarchiadau. Mae canlyniadau yn garreg filltir sylweddol ym mywydau dysgwyr, a bydd llawer yn edrych ymlaen at eu camau nesaf – boed hynny tuag at waith, prentisiaeth, neu addysg uwch. 

"Rwy'n gobeithio y cawsoch y graddau yr oeddech yn gobeithio eu cael. Os na, peidiwch â phoeni. Mae llawer o wybodaeth a chymorth ar gael i chi, gan gynnwys trwy eich ysgol neu goleg yn ogystal â gwybodaeth am bwy all eich helpu ar ein gwefan.” 

 "Y trefniadau ar gyfer cymwysterau eleni oedd y cam olaf wrth ddychwelyd yn raddol i brosesau cyn y pandemig a ddechreuodd pan ddaeth arholiadau ffurfiol yn ôl yn 2022. Mae’r gwahaniaethau yn y dulliau dyfarnu dros y pedair blynedd diwethaf yn golygu na ddylid gwneud cymariaethau rhwng canlyniadau blynyddol yn ystod y cyfnod hwn.”

Inline Tweet: https://twitter.com/YsgolGwynllyw/status/1823998091952783422