Bwriad trefnwyr y digwyddiad yw casglu barn y cyhoedd am osod y camerâu'n barhaol yn ardaloedd Bro Cynnan, Ffordd Caerdydd Isaf a'r cyffiniau.

 

Cyngor Gwynedd, mewn partneriaeth â Chyngor Tref Pwllheli a Heddlu Gogledd Cymru, sydd yn ystyried gosod y camerâu ychwanegol yn y lleoliadau hyn.

 

Byddai gosod y camerâu yma yn cael ei ariannu drwy Gronfa Ffyniant Gyffredin Llywodraeth y DU. 

 

Un o nodau’r Gronfa yw adeiladu "cymdogaethau gwydn, diogel ac iach, sy’n cynnwys gwelliannau wedi’u targedu i’r amgylchedd adeiledig a dulliau arloesol o atal troseddau." 

 

Bwriad y cynllun yma yw gosod camerâu cylch cyfyng ychwanegol, gyda'r nod o wella ymdeimlad pobl o ddiogelwch a lleihau troseddau yn yr ardal.

 

Dywed y trefnwyr y byddai preifatrwydd pobl sy'n byw mewn tai cyfagos i'r camerâu yn cael ei ddiogelu gan fod modd cuddio unrhyw ffenestri tai o olwg y camerâu os byddai'r cynllun yn cael ei gymeradwyo.

 

Bydd y cyfarfod cyhoeddus nos Iau yn cael ei gynnal yn Llyfrgell Neuadd Dwyfor, Stryd Penlan, rhwng 18:00 a 19:30.