Mae dyn 41 oed wedi cael ei garcharu am ddifrodi pum car heddlu mewn tref yng Ngwynedd. 

Ymddangosodd Stephen McCouid, sy'n wreiddiol o Lerpwl, yn Llys Ynadon Llandudno ddydd Mercher. 

Plediodd yn euog i bum cyhuddiad o niwed troseddol.

Nos Lun,  fe ddefnyddiodd McCouid garreg i falu ffenestri blaen pum car heddlu y tu allan i orsaf heddlu Caernarfon. 

Cafodd ei garcharu am 10 wythnos. 

Dywedodd Arolygydd Ardal Gogledd Gwynedd, Ian Roberts: "Nid oes modd deall y weithred ddifeddwl a ddiangen hon o ddifrod yn erbyn cerbydau'r gwasanaethau brys.

"Nid oes modd defnyddio y cerbydau sydd wedi eu difrodi o hyd tra eu bod nhw'n cael eu trwsio. 

"Yn ffodus, rydym ni'n parhau i allu ymateb i argyfyngau yn ystod y gwyliau ysgol prysur, ond gallai hyn fod wedi bod yn wahanol iawn."