Roedd cannoedd yn bresennol yn angladd cyn-chwaraewr a rheolwr pêl-droed Cymru, Terry Yorath yn Leeds ddydd Llun.

Fe gyrhaeddodd ei hers Eglwys Gatholig Immaculate Heart of Mary yn y ddinas wedi ei haddurno gyda blodau yn siâp baner Cymru, lliwiau Leeds United a’r geiriau ‘Dad’ a ‘Grandad’.

Roedd Côr Meibion Taf o Gaerdydd yn canu yn angladd Terry Yorath, gan ddweud wrth Newyddion S4C ei fod yn “anrhydedd anferth”. Dechreuodd yr angladd gyda chanu Hen Wlad fy Nhadau a Cwm Rhondda.

Daeth y gwasanaeth i ben wrth i'r côr ganu Danny Boy, You'll Never Walk Alone a Gwahoddiad.

Wrth roi teyrnged i'w dad yn yr angladd, dywedodd ei fab Jordan Yorath ei fod yn ddyn "doniol, caredig, gostyngedig a balch".

Inline Tweet: https://twitter.com/NewyddionS4C/status/2015856911346721036

Bu farw Terry Yorath yn 75 oed ar 8 Ionawr ar ôl salwch byr.

Wedi ei eni a'i fagu yng Nghaerdydd, fe enillodd Terry Yorath 59 o gapiau dros Gymru rhwng 1969 a 1981 ac roedd yn hyfforddwr ar ei wlad rhwng 1988 ac 1993.

Roedd hefyd yn hyfforddwr ar Abertawe a Chaerdydd am gyfnodau yn y 1990au.

Sgoriodd Yorath 11 gôl mewn 199 o ymddangosiadau i Leeds United, ei glwb proffesiynol cyntaf, mewn cyfnod o naw mlynedd o 1967 ymlaen.

Roedd ganddo bedwar o blant, Jordan, Gabby, Louise a Daniel.

Bu farw Daniel yn 15 oed yn 1992 o gyflwr ar y galon wrth chwarae pêl-droed gartref gyda'i dad.

Wrth siarad yn yr angladd, dywedodd y cyflwynydd Elis James bod marwolaeth Daniel wedi "difrodi'r teulu a'r gymuned gyfan" ac wedi effeithio'n fawr ar Terry Yorath "am weddill ei fywyd".