Mae stelciwr wnaeth rannu llun preifat o'i ddioddefwr ar-lein ar ôl cwrdd â hi yng Nghaergybi wedi cael ei garcharu.

Ymddangosodd Ian Paul Atkinson o Clwyd Terrace, New Brighton, Wallasey, yn Llys Ynadon Caernarfon ar 12 Awst.

Plediodd yn euog i stelcian, rhannu lluniau preifat heb ganiatâd, a bygwth rhannu lluniau preifat.

Roedd y dyn 52 oed wedi bod mewn perthynas tymor byr hefo'r dioddefwr, cyn dechrau cysylltu â hi yn erbyn ei dymuniad. Byddai'n ei ffonio a'i thecstio'n rheolaidd.

Ar ôl cytuno i'w gyfarfod mewn tafarn yng Nghaergybi ar 19 Gorffennaf, fe wnaeth fygwth rhannu lluniau preifat o’r ddynes ar-lein os nad oedd hi'n parhau prynu diodydd iddo fo.

Gadawodd y ddynes ond roedd yn gallu clywed Atkinson yn gweiddi ei henw.

Fe wnaeth ei ffonio hi eto'r noson honno, ond er gwaethaf gofyn iddo fo adael llonydd iddi, y diwrnod canlynol, fe wnaeth ddeffro a gweld ei bod wedi methu 30 o alwadau ac wedi derbyn sawl neges llais ymosodol gan Atkinson, gan gynnwys un yn bygwth llosgi ei thŷ i lawr.

Y noson honno, anfonodd luniau preifat o'r dioddefwr dros negeseuon cyfryngau cymdeithasol hefyd.

‘Perygl gwirioneddol’

Cafodd ei garcharu am 26 wythnos a chafodd orchymyn atal a barhaodd am bum mlynedd.

Dywedodd y Rhingyll Dylan Thomas: "Dwi'n cymeradwyo'r dioddefwr am ei dewrder wrth ddod ymlaen yn dilyn ymddygiad obsesiynol Atkinson.

"Mae stelcian yn drosedd ddifrifol sy'n gallu gwaethygu'n gyflym a rhoi bywydau dioddefwyr mewn perygl gwirioneddol.

"'Da ni'n cymryd adroddiadau o stelcian o ddifrif a byddwn yn eich helpu drwy gydol unrhyw ymchwiliad.

"Os 'da chi'n profi stelcian, peidiwch â dioddef ar eich pen eich hun, riportiwch o."

Os 'da chi wedi dioddef stelcio, cysylltwch hefo'r heddlu ar-lein neu drwy ffonio 101, neu fel arall drwy asiantaeth gymorth.