Mae gwasanaeth coffa wedi cael ei gynnal i dalu teyrnged i ferch fach naw oed a gafodd ei lladd yn ystod gweithdy dawns yn Southport wythnos diwethaf.

Cafodd Alice da Silva Aguiar ei lladd yn ystod yr ymosodiad a dwy o ferched eraill, Bebe King ac Elsie Dot Stancombe. Yn ogystal cafodd 10 arall eu hanafu yn ddifrifol.

Yn ystod y gwasanaeth yn Eglwys St Patrick yng Nglannau Mersi fe wnaeth ffrindiau a theulu Alice ganu emynau a darllen teyrngedau yn Saesneg a Phortiwgaleg.

Fe ddiolchodd rhieni Alice i'r gymuned yn lleol am y gefnogaeth ac fe ddarllenodd ei phrifathrawes deyrngedau gyda rhai o'i chyd-ddisgyblion.

Dywedodd Jinnie Payne: "Os bydden ni yn gallu ei disgrifio hi mewn tri gair fe fydden ni yn dweud anhygoel, gofalgar a hyderus. 

"Os oeddech chi'n cael diwrnod gwael ac angen rhywun, byddai Alice yno i'ch helpu chi."

'Caru'

Fe siaradodd un person ar ran y teulu gan ddweud: "Alice ti yw'r ferch fwyaf prydferth a mwyaf cryf yn y byd a dwi'n gobeithio dy fo ti'n gwybod ein bod ni yn dy garu o waelod ein calonnau. Para i wenu a dawnsio gyda'r merched."

Mae disgwyl i angladd Alice gael ei chynnal ddydd Sul.

Mae Axel Muganwa Rudakubana sydd yn 17 oed wedi ei gyhuddo o dri chyhuddiad o lofruddiaeth, 10 cyhuddiad o geisio llofruddio, a bod â llafn yn ei feddiant.

Llun: Heddlu Glannau Mersi