Mae perchennog tafarn a ofynnodd i bobl oedd yn canu yn Gymraeg i adael wedi dweud bod "y cyfryngau yn tueddu i wneud i bethau edrych yn waeth nag y maen nhw."

Ddydd Sul roedd y cyn gyflwynydd tywydd Siân Lloyd wedi cyhoeddi ar-lein bod cyfaill iddi wedi ei thaflu allan o dafarn y Blue Bell neu'r Gloch Las yng Nghonwy am “ganu yn Gymraeg”.

Ond fore Llun roedd hi wedi dweud ar X bod hi wedi siarad gyda'r perchennog, Jared Dunn a'i bod hi wedi cael "sgwrs hyfryd" ag ef.

"Roeddem wedi cytuno ar nifer o bethau, ond yn enwedig ar sut mae'r cyfryngau cymdeithasol yn gwneud i bethau edrych yn waeth nag y maen nhw.

"Dwi nawr yn edrych ymlaen at gwrdd ag ef a dweud iechyd da dros beint o Guinness."

Inline Tweet: https://twitter.com/SianWeather/status/1820211517880774791

Wrth ymateb i'r honiadau ddydd Sul dywedodd Mr Dunn nad oedd yr iaith Gymraeg yn ffactor.

“Dydw i ddim hyd yn oed am ymateb honiadau hurt am iaith,” meddai.

“Does dim ots os ydych chi’n canu yn Saesneg, Cymraeg, Tsieinëeg neu Rwsieg, fe fyddwn ni’n gofyn i chi stopio, ac os na fe fyddwn ni’n gofyn i chi adael.”

Awgrymodd bod y sylw i'r digwyddiad “wedi creu drama lle nad oedd dim mewn gwirionedd”.