Mae tafarn yng Nghonwy a ofynodd i bobl oedd yn canu yn Gymraeg i adael wedi dweud nad oedd y penderfyniad ddim byd i’w wneud â’r iaith.

Dywedodd tafarn y Blue Bell, neu'r Gloch Las, yng Nghonwy nad oedden nhw’n caniatau “canu mewn grwpiau mawr” am ei fod yn newid “naws” y dafarn.

Daw ymateb y dafarn wedi i’r cyn gyflwynydd tywydd Sian Lloyd gyhoeddi arlein bod cyfaill iddi wedi ei thaflu allan o’r dafarn am “ganu yn Gymraeg”.

“Pwy sydd eisiau ymuno â mi wrth ganu’n hyfryd yn Gymraeg yn The Blue Bell yng Nghonwy?” gofynnodd.

“Mae ffrindiau i mi newydd gael eu taflu allan am ganu yn eu hiaith frodorol. 

“Gallwn ni naill ai ganu nerth bein pennau neu eu boicotio.”

Inline Tweet: https://twitter.com/SianWeather/status/1819830209018834984

Ond mae’r dafarn wedi wfftio unrhyw awgrym bod pobl wedi gorfod gadael am eu bod nhw’n canu yn Gymraeg.

“Dydw i ddim hyd yn oed am ymateb honiadau hurt am iaith,” medden nhw.

“Does dim ots os ydych chi’n canu yn Saesneg, Cymraeg, Tsieinëeg neu Rwsieg, fe fyddwn ni’n gofyn i chi stopio, ac os na fe fyddwn ni’n gofyn i chi adael.”

Awgrymodd bod y sylw i'r digwyddiad “wedi creu drama lle nad oedd dim mewn gwirionedd”.