Mae rhybudd melyn am stormydd mewn grym ar gyfer y rhan fwyaf o Gymru ddydd Iau. 

Bydd y rhybudd mewn grym hyd at 23.59 nos Iau ac fe allai ardaloedd yn y gogledd, canolbarth a’r de gael eu heffeithio, yn ôl y Swyddfa Dywydd. 

Fe allai’r tywydd garw – sydd yn cynnwys cawodydd trwm a mellt a tharanau – achosi oedi ar y ffyrdd ac ar drafnidiaeth gyhoeddus. 

Mae’r Swyddfa Dywydd hefyd wedi rhybuddio fod posibilrwydd o lifogydd mewn ardaloedd. 

Mae disgwyl i gawodydd trwm symud tuag at y gogledd-ddwyrain yn ystod y bore gan barhau hyd at ganol dydd. 

Yn ystod y prynhawn, mae disgwyl i stormydd symud i'r de ac fe allai rhai ardaloedd yno gael hyd at 50mm o law o fewn cyfnod o awr neu ddwy. 

Fe ddaw hyn wedi i'r wlad fwynhau cyfnod o dywydd hafaidd, clir a chynnes ar ddechrau'r wythnos.

Mae’r rhybudd melyn mewn grym ar gyfer y siroedd canlynol:

• Blaenau Gwent
• Pen-y-bont ar Ogwr
• Caerffili
• Caerdydd
• Caerfyrddin
• Ceredigion
• Conwy
• Sir Ddinbych
• Sir y Fflint
• Gwynedd
• Merthyr Tudful
• Sir Fynwy
• Castell-nedd Port Talbot
• Casnewydd
• Powys
• Rhondda Cynon Taf
• Abertawe
• Torfaen
• Bro Morgannwg
• Wrecsam