Cafodd dyn 21 oed ei ddarganfod yn farw yn ystafell ei westy gan ffrindiau tra’r oedd ar wyliau yn Sbaen, clywodd cwest ddydd Llun.

Roedd Harvey Dominy, o Ferthyr Tudful, wedi ymweld â Benidorm am wyliau gyda'i ffrindiau yn gynharach ym mis Gorffennaf.

Gadawodd ei griw o ffrindiau’r gwesty tua 7pm nos Fawrth, 16 Gorffennaf.

Pan wnaethon nhw ddod yn ôl rai oriau’n ddiweddarach fe wnaethon nhw ddod o hyd i Mr Dominy ar y llawr heb guriad calon.

Clywodd Llys y Crwner ym Mhontypridd bod y gwasanaethau brys wedi eu galw ond fe gyhoeddwyd bod Mr Dominy wedi marw yn y fan a'r lle.

Yr amcangyfrif oedd ei fod wedi marw rywbryd rhwng 9pm a 10.30pm y noson honno.

Cafodd ei adnabod gan ei ffrindiau a chynhaliwyd archwiliad post-mortem ond nid oedd achos ei farwolaeth yn glir.

Gohiriwyd y cwest gan grwner cynorthwyol canol de Cymru Kerrie Burge hyd nes y daw rhagor o wybodaeth i law gan awdurdodau Sbaen. 

Anfonodd ei chydymdeimlad at deulu Mr Dominy.