Mae awdurdodau iechyd yn nhalaith Kerala yn India wedi cyhoeddi rhybudd i bobl fod yn wyliadwrus ar ôl i fachgen 14 oed farw o’r feirws Nipah.

Yn ôl Gweinidog Iechyd y dalaith, mae 60 o bobl eraill mewn perygl o gael yr afiechyd.

Dywedodd Veena George bod y rhai ddaeth mewn cysylltiad â’r bachgen wedi eu profi a’u bod yn ynysu.

Feirws heintus yw hwn sydd yn cael ei drosglwyddo o rhai anifeiliaid i bobl, meddai Sefydliad Iechyd y Byd.

Gall hefyd gael ei basio ymlaen trwy fwyd os yw’r bwyd hwnnw wedi ei heintio, neu os yw rhywun wedi bod mewn cysylltiad â pherson heintus.

Mae pryder y gall sbarduno epidemig.

Fe wnaeth y bachgen 14 oed farw ddydd Sul, diwrnod ar ôl cadarnhad ei fod wedi cael y feirws meddai gwasanaethau newyddion yn India.

Mae dwsinau o farwolaethau wedi bod yn y dalaith ers 2018 pan ddaeth yr adroddiadau cyntaf o’r feirws.

Y cyngor i drigolion lleol yw gwisgo mygydau tu allan ac i beidio ymweld â phobl yn yr ysbyty.