Mae Jeremy Miles wedi enwebu’r ysgrifennydd iechyd, Y Farwnes Eluned Morgan yn yr etholiad ar gyfer Arweinydd Llafur Cymru.

Dywedodd Mr Miles fore dydd Sul: “Rwy’n gobeithio y bydd Eluned yn dod yn arweinydd i ni – byddai ei harweinyddiaeth yn ein galluogi ni i gyd i symud ymlaen, yn unedig wrth wireddu gweledigaeth llywodraeth Lafur Cymru.”

Daw ei gyhoeddiad ar ôl i’r Farwnes Morgan ddweud yn gynharach fore Sul ei bod yn “rhoi ystyriaeth ddifrifol” i sefyll fel arweinydd Llafur Cymru.

Mae Llafur Cymru wedi cadarnhau y byddan nhw'n ethol rhywun i gymryd lle Vaughan Gething erbyn canol mis Medi.

Dywed y farwnes ei bod yn edrych ar “docyn undod” gyda chyd-aelod o’r Cabinet, Huw Irranca Davies, yn rhedeg fel ei dirprwy.

Dywedodd wrth Politics Wales fod ganddi “dipyn o gefnogaeth” ar draws Llafur ond nid oedd yn fodlon cadarnhau a oes ganddi’r chwe enwebiad gofynnol i’w gosod ar y papur pleidleisio.  

Mae gan wleidyddion y blaid sy’n aelodau o’r Senedd tan 12:00 ddydd Mercher i benderfynu pwy maen nhw'n ei gefnogi yn yr ornest arweinyddiaeth, a sbardunwyd ar ôl i'r prif weinidog gyhoeddi ei ymddiswyddiad yr wythnos ddiwethaf.

Roedd disgwyl i’r cyn Ysgrifennydd Economi Jeremy Miles - redeg yn y ras.

Yn ôl adroddiadau roedd ganddo ddigon o gefnogaeth ei gydweithwyr i sicrhau ei le ar y papur pleidleisio.

Mae cefnogwyr Mr Gething yn honni na fyddai Mr Miles yn gallu uno plaid Lafur y Senedd.

Cafodd Mr Miles ei drechu o drwch blewyn gan Mr Gething yn y ras arweinyddiaeth ddiwethaf.

Dywedodd Eluned Morgan wrth Politics Wales ei bod yn gobeithio cadarnhau ei chais o fewn “yr ychydig oriau neu ddyddiau nesaf”.

“Mae yna gryn dipyn o gefnogaeth... gan wahanol adrannau o’r blaid Lafur,” meddai.

Dywedodd “does dim angen i chi berthyn i unrhyw garfan benodol” i’w chefnogi.

Enwebiad

Yn sgil ei chyhoeddiad fe wnaeth Jeremy Miles ei henwebu yn yr etholiad ar gyfer Arweinydd Llafur Cymru.

Dywedodd Jeremy Miles: “Rwyf heddiw yn enwebu Eluned Morgan fel arweinydd Llafur Cymru.

“Rwy’n gobeithio y bydd Eluned yn dod yn arweinydd i ni – byddai ei harweinyddiaeth yn ein galluogi ni i gyd i symud ymlaen, yn unedig wrth wireddu gweledigaeth llywodraeth Lafur Cymru.”

"Mae Eluned yn ffrind yn ogystal ag yn gydweithiwr gwerthfawr. 

"Mae hi wedi sefyll dros fuddiannau Cymru yn y Senedd ond hefyd yn Ewrop, a San Steffan. 

"Mae'r gwerthoedd y mae'n eu hyrwyddo - o degwch, ffyniant i bawb, dyfodol gwyrddach a setliad datganoli cryf - yn rhai yr wyf yn eu rhannu'n angerddol. 

"Byddai Llafur Cymru o dan Eluned yn estyn allan ac yn cynrychioli pob rhan o'n cenedl.

“Ar nodyn personol, rwy’n ddiolchgar iawn i gymaint o bobl am yr anogaeth i sefyll yn yr etholiad hwn.

“Rwyf wastad wedi rhoi buddiannau ein gwlad a’n plaid yn gyntaf, ac rwy’n gwbl sicr mai Eluned sydd yn y sefyllfa orau i fynd â’r wlad a’r blaid ymlaen.”