Bydd Syr Keir Starmer yn addo "dechrau perthynas agosach" gydag Ewrop mewn uwchgynhadledd yn Lloegr ddydd Iau.

Dyma'r tro cyntaf i'r Prif Weinidog newydd gynnal Uwchgynhadledd y Gymuned Wleidyddol Ewropeaidd (EPC) a fydd yn canolbwyntio ar y rhyfel yn Wcráin eleni.

Mae disgwyl i o leiaf 45 o arweinwyr Ewropeaidd fynychu'r digwyddiad ym Mhalas Blenheim yn Sir Rydychen ar gyfer cyfarfod o’r Gymuned Wleidyddol Ewropeaidd (EPC), a gafodd ei sefydlu ar ôl i Rwsia ymosod ar Wcráin ddwy flynedd yn ôl.

Mae holl wledydd Ewrop - gan eithrio Rwsia a Belarws - wedi cael eu gwahodd i'r uwchgynhadledd.

Bwriad y digwyddiad yw annog cefnogaeth i'r Wcráin, lle mae disgwyl i'r ymladd ddwysau dros yr haf.

Cyn yr uwchgynhadledd, fe wnaeth Syr Keir addo y byddai'r DU yn “chwarae rôl fwy gweithredol ar lwyfan y byd”.

Dywedodd: “Bydd yr EPC yn tanio’r gwn cychwyn ar agwedd newydd y llywodraeth at Ewrop, un a fydd nid yn unig o fudd i ni nawr, ond i genedlaethau i ddod, o ddatgymalu’r gweoedd smyglo pobl sy’n masnachu pobl ledled Ewrop, i sefyll i fyny i weithredoedd barbaraidd Putin yn Wcráin ac ansefydlogi gweithgareddau ledled Ewrop.”

Bydd mwy o ymdrechion Ewropeaidd i fynd i’r afael â gangiau sy’n smyglo pobl, yn ogystal â phenderfyniadau lloches gyflymach, gyda 100 o staff y Swyddfa Gartref yn cael eu hadleoli i helpu'r rhai oedd yn aflwyddiannus gyda'u cais am loches i ddychwelwyd i’w mamwlad.