Cafodd golffiwr dipyn o sioc wrth chwarae mewn clwb golff yn Sir Benfro, ar ôl darganfod yr hyn oedd yn ymddangos fel sgerbwd llaw ar y cwrs.

Fe wnaeth aelod o Glwb Golff Dinbych-y-pysgod ddarganfod y llaw ger twll cwningen ar nawfed twll y cwrs ddydd Gwener.

Mewn datganiad ar eu tudalen Faecebook dywedodd y clwb eu bod nhw wedi cael eu galw i'r twll gan yr aelod cyn mynd ati i alw'r heddlu.

Cafodd cordon ei osod o gwmpas y twll cyn i'r sgerbwd gael ei gludo i orsaf yr heddlu er mwyn dadansoddiad pellach.

Dywedodd y clwb, sydd wedi ei leoli ger Traeth y De yn Ninbych-y-pysgod, bod canlyniadau'r sganiau yn amhendant ac fe gafodd timau Ymchwilio i Leoliadau Trosedd eu galw ar gyfer archwilio ymhellach.

Wedi oriau o archwilio meddai'r clwb, cadarnhaodd y tîm ymchwilio nad sgerbwd llaw dynol a gafodd ei ddarganfod, ond un anifail.

Nid oedd yr heddlu yn gallu cadarnhau rhywogaeth yr anifail.

'Cyffro a dirgelwch'

Dywedodd Rheolwr Clwb Golff Dinbych-y-pysgod bod y canfyddiad yn destun sgwrs ymysg yr holl aelodau.

"Nid pob dydd rydych chi'n dod ar draws rhywbeth fel hyn ar gwrs golff," meddai.

"Yn sicr fe ychwanegodd ychydig bach o gyffro a dirgelwch i'n diwrnod arferol.

"Mae'n stori fydd yn cael ei hail-adrodd am flynyddoedd i ddod."