Roedd hi'n noson lwyddiannus i'r asgell dde eithafol yn Ffrainc nos Sul yn y rownd gyntaf o etholiadau'r cynulliad. 

Enillodd plaid y Rali Genedlaethol, Rassemblement National, 33.2% o'r bleidlais, gyda'r glymblaid asgell chwith yn sicrhau 28.1% a chlymblaid yr Arlywydd Emmanuel Macron yn ennill 21%.

Dywedodd arweinydd y Rali Genedlaethol Jordan Bardella: "Dwi'n anelu at fod yn brif weinidog ar gyfer holl bobl Ffrainc, os ydy'r Ffrancwyr yn pleidleisio drostom ni."

Dyma'r tro cyntaf yn hanes y wlad i'r asgell dde eithafol ennill y rownd gyntaf o etholiadau cynulliad. 

Bydd y rownd nesaf yn cael ei chynnal ddydd Sul, gyda Marine Le Pen a Jordan Bardella yn anelu at sicrhau mwyafrif o 289 o'r 577 o seddi yn y Cynulliad Cenedlaethol.

Nid oedd angen i Emmanuel Macron alw'r etholiad am dair blynedd arall, ond wedi llwyddiant y Rali Genedlaethol yn etholiadau Ewrop, dywedodd mai dyma oedd y "datrysiad mwyaf cyfrifol".

Wrth ymateb i'r canlyniad nos Sul, dywedodd Prif Weinidog Ffrainc Gabriel Attal: "Ni ddylai unrhyw bleidlais fynd i'r Rali Genedlaethol. Mae cymaint yn y fantol er mwyn sicrhau na fydd y Rali Genedlaethol yn sicrhau mwyafrif."

Beth bynnag y canlyniad, mae Mr Macron wedi dweud na fydd yn ymddiswyddo fel arlywydd.

Byddai llwyddiant i'r Rali Genedlaethol yn gallu arwain at bron i dair blynedd o 'cohabitation', sef pan mae arlywydd un plaid yn bennaeth y wlad, a phlaid arall yn arwain y llywodraeth.