Bydd Arlywydd Rwsia, Vladimir Putin, yn ymweld â Gogledd Corea am y tro cyntaf ers 24 mlynedd pan fydd yn teithio i Pyongyang ddydd Mawrth.

Mae disgwyl i Mr Putin gyrraedd y brifddinas i gwrdd ag arweinydd Gogledd Corea, Kim Jong Un yn y brifddinas.

Fe wnaeth y ddau arweinydd gyfarfod ddiwethaf ym mis Medi yn nwyrain Rwsia, ond dyma ymweliad cyntaf Putin â Pyongyang ers 2000.

Mewn llythyr a gyhoeddwyd yn y cyfryngau yng Ngogledd Corea, fe addawodd Putin adeiladu systemau masnach a diogelwch gyda Pyongyang "sydd ddim yn cael eu rheoli gan y Gorllewin".

Mae’r Kremlin wedi disgrifio’r digwyddiad fel “ymweliad gwladwriaeth gyfeillgar”.

Mae cyfryngau Rwsia yn dweud y gallai Putin a Kim Jong Un arwyddo cytundeb bartneriaeth, gan gynnwys materion diogelwch, a bydd y ddau yn rhoi datganiadau ar y cyd i’r cyfryngau.

Dywedodd Kim Jong Un yr wythnos diwethaf fod cysylltiadau â Rwsia wedi “datblygu i fod yn berthynas na ellir ei thorri".

Cyn ei ymweliad diolchodd Putin i Ogledd Corea am eu cefnogaeth i'r wlad wrth i'r rhyfel yn erbyn Wcráin barhau.

Dywedodd yr Unol Daleithiau eu bod yn pryderu am y "berthynas rhwng y ddwy wlad yma".

“Dydyn ni ddim yn poeni am y daith”, meddai llefarydd ar ran y Cyngor Diogelwch Cenedlaethol John Kirby ddydd Llun.

“Yr hyn rydyn ni’n poeni amdano yw’r berthynas ddwys rhwng y ddwy wlad yma.”