Mae bachgen 16 oed wedi marw ar ôl i goeden ddisgyn ar ei ben o. 

Dywedodd Heddlu Sir Nottingham fod dau ddyn, 28 a 31 oed, wedi cael eu harestio ar amheuaeth o ddynladdiad yn gysylltiedig â marwolaeth ddydd Sadwrn. 

Cafodd dynes 28 oed ei harestio hefyd ar amheuaeth o gynorthwyo troseddwr. 

Mae'r tri yn parhau yn y ddalfa. 

Fe gafodd swyddogion eu galw i Carlton-in-Lindrick am 11:21 ddydd Sadwrn wedi adroddiadau fod bachgen wedi cael ei anafu yn ddifrifol. 

Fe wnaeth swyddogion yr heddlu a pharafeddygon fynychu ond bu farw'r bachgen yn y fan a'r lle. 

Dywedodd y Ditectif Arolygydd Simon Harrison: "Roedd hwn yn ddigwyddiad trasig ac mae ein meddyliau ni gyda theulu'r bachgen. 

"Maent wedi gofyn am breifatrwydd yn ystod y cyfnod ofnadwy o anodd yma."