Mae merch wnaeth oroesi gwrthdrawiad yn Sir Stafford lle bu farw tri o’i ffrindiau wedi rhoi teyrnged iddyn nhw.

Cafodd Dafydd Hûw Craven-Jones, 18, o Danyfron, Wrecsam a Morgan Jones, 17, o Goedpoeth, Wrecsam eu lladd ar Ffordd Cannock yn Penkridge ddydd Sadwrn 25 Mai.

Bu farw Sophie Bates o dref Stafford hefyd yn yr ysbyty ar ddydd Mawrth 28 Mai.

Roedd y tri yn teithio mewn car Ford Ka pan ddigwyddodd y gwrthdrawiad.

Fe aeth Brooke Varley, 17 oed, oedd hefyd yn y car, i’r ysbyty gydag anafiadau ond mae erbyn hyn yn ôl adref. 

Wrth rhoi teyrnged i’r tri dywedodd Ms Varley o Newport yn Sir Amwythig bod y tri yn “bobl anhygoel”.

“Mi o’n i eisiau talu teyrnged i fy nhri ffrind Sophie, Morgan a Daf. Dw i mor drist fy mod i wedi colli pobl mor anhygoel o fy mywyd.”

Dywedodd mai Sophie Bates fydd ei “hysbrydoliaeth i wella ac i wneud popeth na chafodd hi y cyfle i wneud”.

“Roedd Morgan yn un o’r bobl mwyaf doniol dw i’n adnabod. Mi oedd wastad yn barchus, caredig ac annwyl. Mi oedd o wastad yn edrych ar fy ôl i. 

“Roedd Daf yn enaid caredig ac yn caru ei ffrindiau." 

Ychwanegodd ei bod yn meddwl am deuluoedd y tri a’r holl bobl sydd wedi eu heffeithio. 

Mae Heddlu Sir Stafford yn dweud ei bod eisiau siarad gyda unrhyw un a welodd y gwrthdrawiad neu sydd ag unrhyw wybodaeth am y car yn arwain at y gwrthdrawiad.