Mae dynes yn ei 50au wedi marw ar ôl ymosodiad gan ddau gi XL Bully yn nwyrain Llundain yn ôl Heddlu'r Met.

Cafodd swyddogion eu galw i gyfeiriad yn ardal Hornchurch yn y brifddinas am tua 13:12 ddydd Llun. 

Fe gafodd y ddynes ei thrin gan feddygon Gwasanaeth Ambiwlans Llundain, ond fe fuodd hi farw yn y fan a'r lle. 

Yn ôl y Met, yn sgil y perygl posib, fe ddaeth swyddogion arfog yno a chymryd y ddau gi, sef dau XL Bully cofrestredig. 

Roedd y cŵn wedi cael eu cau mewn ystafell cyn i'r swyddogion gyrraedd.

Mae teulu'r ddynes yn cael eu cefnogi gan swyddogion arbenigol. 

Mae hi yn drosedd i fod yn berchen ar XL Bully ers 1 Chwefror oni bai bod gan berchnogion yng Nghymru a Lloegr ffurflen sy'n eu heithrio.