Mae’r Eisteddfod Genedlaethol wedi cyhoeddi enwau'r unigolion fydd yn cael eu derbyn i'r Orsedd drwy anrhydedd eleni.

Bydd y sawl ar y rhestr yn cael eu anrhydeddu yn y Brifwyl yn Rhondda Cynon Taf am eu cyfraniad arbennig i Gymru, y Gymraeg ac i'w cymunedau lleol.

Yn unol â threfniadau Urddau er Anrhydedd Gorsedd Cymru, mae pob aelod newydd yn dod yn aelod ar yr un gwastad, sef fel Derwydd.

Mae'r anrhydeddau blynyddol yn cael eu rhannu i dri chategori: 

• Y Wisg Werdd am gyfraniad i'r celfyddydau; 
• Y Wisg Las i'r rhai sy'n amlwg ym myd y Gyfraith, Gwyddoniaeth, Chwaraeon, Newyddiaduraeth, y Cyfryngau, gweithgaredd bro / neu genedl; 
• Y Wisg Wen i enillwyr prif wobrau'r Eisteddfod Genedlaethol yn unig.

Ymysg y bobl fydd yn derbyn y Wisg Werdd mae Angharad Lee, sy'n gyfrifol am gynhyrchu'r ddrama gerdd Nia Ben Aur fydd yn cael ei pherfformio yn yr Eisteddfod eleni; a dirprwy bennaeth Ysgol Llwyncelyn yn y Rhondda, Elin Llywelyn-Williams, sy'n arwain Côr yr Eisteddfod eleni.

Hefyd yn derbyn y Wisg Werdd fydd Derrick Rowlands, a weithiodd yn ddiwyd i godi proffil y Gymraeg o fewn y Gymdeithas Corau Meibion Cymru; Anna ap Robert, swyddog creadigol gyda Theatr Felin-fach a thiwtor Cymraeg i oedolion ym Mhrifysgol Aberystwyth; a'r cerddor Meilyr Tomos, sydd yn teithio o amgylch cartrefi gofal yn ardal Sir Benfro i ddiddanu’r preswylwyr, ac yn perfformio ym mhabell Cytûn ar Faes yr Eisteddfod yn flynyddol.

Ymysg y bobl fydd yn derbyn y Wisg Las mae’r cyn-bostfeistr Noel Thomas, a gafodd ei garcharu ar gam yn 2006 am gadw cyfrifon ffug yn Swyddfa’r Post y Gaerwen, Ynys Môn; y darlledwr Gerallt Pennant, sy'n wyneb cyfarwydd ar rai o raglenni mwyaf poblogaidd S4C; Elfed Roberts, cyn-prif weithredwr yr Eisteddfod Genedlaethol tan 2018; a Rhuanedd Richards, cyfarwyddwr BBC Cymru.

Bydd y gweinidog Rosa Hunt hefyd yn derbyn y Wisg Las am ei chyfraniad "aruthrol" i’w chymuned yn ardal Ton-teg, Pontypridd.

Yn ogystal bydd mam a merch yn cael eu hanrhydeddu gan yr Orsedd eleni.

Bydd Elinor Snowsill, cyn-chwaraewr tîm rygbi cenedlaethol Cymru, yn derbyn y Wisg Las a bydd ei mam Nerys Howells, yr arbenigwr bwyd yn derbyn y Wisg Werdd am ei gwaith yn rhoi cynnyrch Cymreig ar y map byd-eang.

Bydd Eisteddfod Genedlaethol Cymru 2024 yn cael ei chynnal yn Rhondda Cynon Taf rhwng 3-10 Awst.

Urddau'r Orsedd Eisteddfod Rhondda Cynon Taf:

Gwisg Werdd

1. Jane Aaron - Aberystwyth
2. Anna ap Robert - Aberystwyth
3. Simon Chandler - Manceinion
4. Elgan Philip Davies - Aberystwyth
5. Owenna Davies - Ceredigion
6. Anne England - Aber-fan
7. Nerys Howell - Caerdydd
8. Angharad Lee - Tonyrefail
9. Elin Llywelyn Williams - Pont-y-clun
10. Helena Miguelez-Carballeira - Bangor
11. Mari Morgan - Llanelli
12. Catrin Rowlands - Abertawe
13. Derrick Rowlands - Bont-iets
14. Mike Parker - Kidderminster
15. Shân Eleri Passmore - Caerdydd
16. Siwan Rosser - Caerdydd
17. Peter Spriggs - Arberth
18. Llinos Swain - Caerdydd
19. Meilyr Hedd Tomos - Abergwaun
20. Gareth Williams - Pontypridd
21. Siân Rhiannon Williams - Barri

Gwisg Las

1. Delyth Badder - Pontypridd
2. Carol Bell - Llundain
3. Jamie Bevan - Merthyr Tudful
4. Dafydd Trystan Davies - Caerdydd
5. Geraint Davies - Treherbert
6. Michelle Davies - Llangamarch
7. Joseff Gnagbo - Caerdydd
8. Margot Ann Phillips Griffith - Wellington
9. Gill Griffiths - Pentyrch
10. Rosa Hunt - Pentre'r Eglwys
11. Awen Iorwerth - Rhondda
12. Gethin Lloyd James - Llanarthne
13. Theresa Mgadzah Jones - Caerdydd
14. David Lloyd-Jones - Pontypridd
15. Gerallt Pennant - Eifionydd
16. Ian Wyn Rees - Porth Tywyn
17. Rhuanedd Richards - Pontypridd
18. David Roberts - Caerffili
19. Elfed Roberts - Caerdydd
20. Elinor Snowsill - Pont-y-clun
21. Derec Stockley - Cefneithin
22. Hazel Thomas - Crucywel
23. John Thomas - Abertawe
24. Meleri Tudur Thomas - Caernarfon
25. Noel Thomas - Gaerwen
26. Mark Vaughan - Pontarddulais
27. Megan Williams - talaith Efrog Newydd
28. Ynys Williams - Trawsfynydd