Mae cynnwys yr erthygl hon yn trafod hunanladdiad ac mae gwybodaeth am gymorth ar waelod yr erthygl.

Mae dyn o Fangor a geisiodd ladd ei hun 6 wythnos ar ôl genedigaeth ei ail blentyn yn dweud bod angen mwy o gefnogaeth ar dadau yng Nghymru.

Yn 2021 fe ddioddefodd Aled Vaughan Edwards o Fangor gyda’i iechyd meddwl gan geisio dod â’i fywyd i ben.

“O'n i’n flin, jest yn teimlo bod fi methu gwneud digon ac o'n i’n meddwl sa pawb gwell off hebdda fi”.

Ar ôl derbyn cefnogaeth a thriniaeth mae o rŵan wedi sefydlu menter newydd i helpu tadau a’u teuluoedd yn y gogledd orllewin.

Yn dad i ddau o blant, Sulli a Bea, mae Aled yn son am ei falchder a’i gariad o fod yn dad ond yn dweud iddo ddioddef yn fawr gyda heriau iechyd meddwl.

“Tua chwech wythnos oedd hi ar ôl i hi [Bea] gael ei geni es i off a nes i trio cymryd bywyd fy hun”.

“O'n i wedi cyrraedd pwynt lle o'n i’n teimlo... bob dim o'n i’n neud... doedd o ddim yn ddigon i’r plant neu i’r wraig ac o'n i’n flin efo fy hun”.

“Hyd yn oed os oeddwn i yn codi ganol nos, newid nappies, yn helpu fel bod fy ngwraig ddim gorfod, ond doedd o dal ddim yn ddigon i fi felly o'n i wir yn meddwl sa pawb yn well hebdda fi”.

Image

 Wrth edrych yn ôl ar y cyfnod, mae’n dweud mai ei blentyn ieuengaf Sulli wnaeth ei atal o rhag dod â’i fywyd i ben.

“Ddoth o atai y bore yna a nath o roi ei fraich rownd fi a rhoi hug i mi am ddim rheswm”.

“Hwnna nath stopio fi, nid meddwl bod o am dyfu fyny heb dad ond gwybod swn i byth yn teimlo y cariad yna eto, cael rhywun sy’n meddwl gymaint ohona chdi felly nesh i ffonio doctor ac es i syth i A&E a cael triniaeth yna”.

Yn ôl y swyddfa ystadegau gwladol, roedd 74% o'r holl hunanladdiadau yn 2022 yn ddynion.

Mae ystadegau hunanladdiadau rhwng 2022-2023 y gwasanaeth iechyd hefyd yn nodi fod y gyfradd ar ei uchaf o blith dynion rhwng 35-44 oed”.

Image

Wedi derbyn triniaeth a chefnogaeth gan aelodau proffesiynnol a’i deulu a’i ffrindiau, mae o rŵan yn canolbwyntio ar fenter newydd i helpu dynion ifanc a thadau sy’n dioddef.

Enw’r fenter ydi ‘Sut mae Dad?”.

“Does neb yn gofyn y cwestiwn, ‘sut mae dad’?”, meddai.

"Pan nes i  fynd drwy beth nes i, nath neb holi fi sut o'n i fel dad, hyd yn oed professionals - nath neb ofyn i mi ydw i 'n iawn?

“Do, gofyn i’r wraig wrth gwrs, ond jest un conversation yn holi, wyt ti’n iawn, wyt ti angen help?”

Image

Mae’r fenter newydd yn dod â thadau o’r ardal at ei gilydd i fynd am dro anffurfiol, i siarad ac i rannu pryderon.

A hithau’n wythnos codi ymwybyddiaeth am iechyd meddwl, mae o unwaith eto’n pwysleisio pwysigrwydd siarad yn agored am unrhyw bryderon.

Os ydi cynnwys yr erthygl wedi effeithio arnoch mae cymorth ar wefan S4C.