Mae’r Swyddfa Dywydd wedi cyhoeddi rhybudd melyn ar gyfer y rhan helaeth o Gymru wrth i’r tywydd braf ddod i ben ddydd Sul.

Bydd y rhybudd ar gyfer glaw trwm a tharanau mewn grym o 12.00 nes 22.00 ddydd Sul.

Mae’r rhybudd mewn grym ar gyfer holl siroedd Cymru heblaw am Sir Benfro.

Gallai llifogydd sydyn arwain at amodau gyrru anodd a chau rhai ffyrdd a bod yn “beryg i fywyd”, meddai’r Swyddfa Dywydd.

Mae siawns o oedi a rhai gwasanaethau trên a bws yn cael eu canslo, ac y gallai pŵer i rai cartrefi a busnesau gael ei golli.

Mae siawns fach hefyd y gallai cartrefi a busnesau ddioddef llifogydd yn gyflym, gyda difrod i rai adeiladau oherwydd llifddwr, mellt yn taro, cenllysg neu wyntoedd cryfion, medden nhw.

“Mae cawodydd trwm a stormydd mellt a tharanau yn debygol yn hwyr fore Sul ac yn gynnar prynhawn Sul, gan symud yn raddol i'r gogledd cyn clirio,” meddai’r Swyddfa Dywydd.

“Mae rhywfaint o law trwm yn bosibl mewn rhai mannau, gyda hyd at 30 mm mewn llai nag awr ac efallai 40-50 mm dros 2 i 3 awr gan arwain at lifogydd.

“Bydd cenllysg, mellt yn taro'n aml a hyrddiau gwynt cryf yn creu perygl ychwanegol.”

Y siroedd

Bydd y rhybudd yn effeithio ar y siroedd canlynol:

• Abertawe
• Blaenau Gwent
• Bro Morgannwg
• Caerdydd
• Caerffili
• Casnewydd
• Castell-nedd Port Talbot
• Ceredigion
• Conwy
• Gwynedd
• Merthyr Tudful
• Pen-y-bont ar Ogwr
• Powys
• Rhondda Cynon Taf
• Sir Ddinbych
• Sir Fynwy
• Sir Gaerfyrddin
• Sir y Fflint
• Torfaen
• Wrecsam
• Ynys Môn