Mae'r Swyddfa Dywydd wedi cyhoeddi rhybudd melyn ar gyfer stormydd a chawodydd trymion i rannau o Gymru ddydd Llun.

Bydd y rhybudd mewn grym yn rhai o siroedd gogledd Cymru a'r canolbarth o 13:00 hyd at 21:00.

Mae disgwyl "stormydd a tharanau a glaw trwm", meddai'r Swyddfa Dywydd.

Mae llifogydd yn bosibl mewn rhai ardaloedd, o ganlyniad i gyfnodau gwlyb diweddar pan syrthiodd hyd at 40mm o law mewn dwy awr. 

Gallai hynny arwain at amodau gyrru anodd a chau rhai ffyrdd.

Mae'n bosibl y gall rhai golli cyflenwadau pŵer a gwasanaethau eraill mewn cartrefi a busnesau.

Fe fydd y rhybudd yn effeithio ar y siroedd canlynol:

• Conwy
• Sir Ddinbych
• Sir Y Fflint
• Gwynedd
• Powys
• Wrecsam