Fe orffennodd Elfyn Evans yn yr ail safle yn Rali Croatia dros y penwythnos.

Ar ôl cyfnod o arwain y rali ddydd Sadwrn, roedd y Cymro yn yr ail safle cyn y cymal cyffro fore Sul, 6.4 eiliad y tu ôl i’r arweinydd, y Ffrancwr Sebastien Ogier.

Er ei ymdrechion yn y cymal hwnnw, ni lwyddodd i gau’r bwlch ar Ogier, gan orffen y ras 9.7 eiliad y tu ôl i’r enillydd yn y pen draw.

Dyna oedd y 100fed tro i Ogier, sydd yn ran o dîm Toyota Gazoo Racing gydag Evans, i orffen ar y podiwm yn ei yrfa.

Inline Tweet: https://twitter.com/RalioS4C/status/1782026179005776354

Thierry Neuville o Wlad Belg cipiodd y drydydd safle, 36.1 eiliad y tu ôl i Ogier.

Ar ôl cipio ei drydydd podiwm allan o'r pedair rali agoriadol, dywedodd Evans: "Penwythnos cyffrous. 

"Ddim yn hapus efo heddiw wrth gwrs, dim be 'sa ni 'di licio o gwbwl ond 'da ni yma yn y diwedd o leia.

"Dwi'n meddwl, 'be allai 'di bod', ond dyna fo, fel 'na ma'i."

Mae’r canlyniad yn golygu fod y gŵr o Ddolgellau yn parhau yn yr ail safle ym mhencampwriaeth y gyrwyr wedi pedair rali, gyda Neuville yn arwain y ffordd.

Nesaf i’r gyrwyr bydd Rali Portiwgal ar benwythnos 9-12 Mai.