Mae dyn wedi pledio’n euog i ddwyn toiled aur gwerth £4.8 miliwn o Balas Blenheim yn Sir Rhydychen yn 2019.  

Fe blediodd James Sheen, 39 oed o Wellingborough yn Sir Northampton yn euog i fwrgleriaeth yn Llys Ynadon Rhydychen.

Fe gafodd y toiled 18-carat ei ddwyn ym mis Medi 2019 tra oedd yn rhan o arddangosfa gelf. 

Roedd Sheen wedi ymddangos yn y llys trwy gyswllt fideo o garchar HMP Five Wells yn Wellinborough, gan ei fod eisoes wedi cael ei ddedfrydu i’r carchar am gyfnod o 17 mlynedd am sawl bwrgleriaeth arall.

Mae’r troseddau hynny yn cynnwys dwyn gwerth £400,000 o dractorau, yn ogystal â dwyn tlysau drudfawr o amgueddfa rasio ceffylau genedlaethol yn Newmarket.

Mae tri dyn arall wedi pledio’n ddieuog i’r cyhuddiadau sy’n ymwneud â lladrad y tŷ bach.

Mae Michael Jones, 38 oed o Rydychen, wedi ei gyhuddo o fyrgleriaeth. 

Mae FredericK Sines o Ascot, Berkshire a Bora Guccuk o orllewin Llundain wedi eu cyhuddo o gynllwynio er mwyn trosglwyddo eiddo troseddol. 

Mae disgwyl i’r dynion ymddangos yn y llys ym mis Chwefror, 2025. 

Llun: Pete Seaward/Blenheim Palace/PA Wire