Mae’r Swyddfa Dywydd wedi cyhoeddi rhybudd melyn am law trwm i rannau o dde ddwyrain Cymru.

Fe fydd y rhybudd mewn grym o 20:00 tan 23:45 ddydd Sul y Pasg.

Mae disgwyl i rai ardaloedd brofi cawodydd trymion gyda hyd at 30mm o law yn disgyn.

Yn ôl y Swyddfa Dywydd, gall gwasanaethau trafnidiaeth gyhoeddus gael eu heffeithio, gan gynnwys amseroedd teithio hirach.

Fe all llifogydd ar y ffyrdd olygu amseroedd teithio hirach hefyd.

Mae'r rhybudd yn effeithio ar y siroedd canlynol:

• Caerffili
• Caerdydd
• Sir Fynwy
• Casnewydd
• Rhondda Cynon Taf
• Torfaen
• Bro Morgannwg