Mae Llywodraeth Prydain wedi gosod sancsiynau ar Tsieina yn sgil ymosodiad seiber yn 2021.

Mae dau berson ac un cwmni wedi cael eu cosbi.

Yn ôl y Dirprwy Brif Weinidog Oliver Dowden, China oedd yn gyfrifol am yr ymosodiad seiber a ddatgelodd fanylion personol 40 miliwn o bleidleiswyr.

Ond yn ôl China honiadau “cwbl ddi-sail” yw'r rhain sydd ddim llai na “siarad maleisus”.

Mae’r sancsiynau wedi eu gosod ar yr unigolio Zhao Guangzong a Ni Gaobin a’r cwmni Wuhan Xiaoruizhi Science and Technology Company Ltd.

Fe ddigwyddodd yr ymosodiadau ar y Comisiwn Etholiadol ym mis Awst 2021, ond dim ond y llynedd y cawsant eu datgelu.

Y gred yw bod sawl aelod seneddol ac arglwydd sydd wedi bod yn feirniadol o China hefyd wedi cael eu targedu.

Roedd y manylion ar y cofrestrau yn cynnwys enw a chyfeiriad unrhyw un yn y DU a gofrestrodd i bleidleisio rhwng 2014 a 2022, yn ogystal ag enwau’r rhai sydd wedi’u cofrestru fel pleidleiswyr tramor.