Mae Arglwydd Ceidwadol wedi ei feirniadu wedi iddo honni bod siaradwyr Cymraeg yn gyfrifol am “ffasgaeth ieithyddol bron” yng Nghymru.

Fe wnaeth yr Arglwydd Moylan, sy’n gyn-ymgynghorydd i Boris Johnson, y sylwadau yn Nhŷ’r Arglwyddi ddydd Iau.

Mewn dadl ar bwnc yr undeb dywedodd bod iaith yn “arf i hybu ymdeimlad cenedlaetholgar”.

“Pan ydw i’n edrych ar Gymru rydw i’n gweld y ffasgiaeth ieithyddol bron sy’n bodoli bellach mewn rhannau ohoni,” meddai.

“Rwy’n bryderus iawn y byddwn yn cael ein hunain, ar ryw achlysur yn y dyfodol, mewn sefyllfa yn debyg iawn i'r Alban yn 2014.

“Bryd hynny, hanner ffordd drwy ymgyrch y refferendwm, sylweddolom y gallen ni golli refferendwm ar yr undeb, a’n bod ni wedi colli cyswllt.

“Nid wyf am weld rhywbeth o’r fath yn digwydd yng Nghymru.”

‘Cenedl ddwyieithog’

Wrth ymateb, dywedodd y Farwnes Humphreys, cyn lywydd y Democratiaid Rhyddfrydol yng Nghymru, ei bod hi “wir yn gwrthwynebu'r term ‘ffasgiaeth ieithyddol’”.

“Mae pobl yn methu a deall fod Cymru yn genedl ddwyieithog, ac mae gan bobol yr hawl i ddefnyddio eu hiaith gyntaf, beth bynnag yw’r iaith honno, neu’r ddwy iaith os ydyn nhw’n dymuno gwneud hynny,” meddai.

Dywedodd y Farwnes Chapman, cyn-AS Darlington, ei fod yn “ddrwg iawn” ganddi glywed y sylwadau.

“Rwy’n ei wahodd yn dyner, gyda pharch, i ystyried ei ieithwedd ac a oedd naws ei sylwadau a allai gael eu dehongli fel rhai braidd yn ddi-hid o fudd wrth gryfhau neu wanhau'r undeb.”