Tri mis ers iddo gael ei benodi'n rheolwr Como 1907 yn yr Eidal, mae Osian Roberts wedi cael ei ganmol i'r cymylau gan ei reolwr cynorthwyol, Cesc Fàbregas.

Mewn cyfweliad â Sgorio, dywedodd Fàbregas, sydd wedi ennill Cwpan y Byd a chwpanau yn Lloegr, Sbaen a Ffrainc ei fod wedi dysgu gymaint gan Roberts yn barod.

“Mae Osian yn wych, dwi’n dysgu cymaint ganddo,” meddai.

“Mae’n brofiad grêt, ac mae’n berson grêt i gael o gwmpas, mae e fel mentor, mae e wedi hyfforddi ac addysgu nifer o chwaraewyr a hyfforddwyr da dyddiau yma.

“Mae’n bersonoliaeth gwych i gael o gwmpas a dwi’n dysgu llawer ganddo."

Image

Mae Osian Roberts wedi gweithio gyda nifer o oreuon y byd pêl-droed gan gynnwys Theirry Henry, Mikel Arteta a Patrick Vieira.

Dywedodd Fàbregas ei fod wedi siarad gyda nhw am Roberts, ac roedden nhw hefyd yn ei ganmol.

“Roedden nhw i gyd wedi rhoi adborth gwych amdano," meddai.

“Ar ryw bwynt roedd pob un ohonyn nhw eisiau [Roberts] fel eu rheolwr cynorthwyol, felly mae hynny’n adrodd cyfrolau."

Cyd-weithio

Cafodd Roberts ei benodi'n rheolwr Como 1907, sydd yn chwarae yn yr ail haen yn Yr Eidal ym mis Rhagfyr y llynedd.

Maen nhw'n drydedd yn y gynghrair gyda 10 gêm yn weddill.

Y nod yw ceisio cyrraedd Serie A, ac mae'r dyn o Fôn yn falch o gael Fàbregas wrth ei ochr o geisio cyflawni hynny, gan fod ganddo gymaint o wybodaeth am y clwb a'r gynghrair.

“Oeddan ni’n gwybod wrth gwrs o ffrindiau oedd gynnon ni’n dau y bysa ni’n gallu gweithio’n dda efo’n gilydd," meddai.

“Mae’n nabod y gynghrair, mae’n nabod y timau eraill, mae’n nabod y stadiwm, pwy ‘da ni’n mynd i chwarae nesa’ a mae ‘di chwarae ar y cae synthetig.

“Mae ei help o a’i brofiad o o ran hynny, yn hollbwysig. Ac wedyn mae o’n nabod y stafall newid, mae’n nabod y personoliaethau yna ac wrth gwrs, mae’n siarad Eidaleg.

“Mae o’n bersonoliaeth ac yn berson pwysig yn y clwb.”