Mae bachgen 13 oed wedi marw yn yr ysbyty yn dilyn gwrthdrawiad yng Nghwm Cynon ddydd Iau diwethaf. 

Cyhoeddodd Heddlu De Cymru mai Kaylan Hippsley yw enw'r bachgen a fu farw, a'i fod yn dod o Hirwaun.

Cafodd y gwasanaethau brys eu galw i Heol Aberhonddu, Hirwaun am 18.25 nos Iau yn dilyn gwrthdrawiad rhwng car Ford Fiesta brown a'r bachgen a oedd yn cerdded ar y pryd. 

Mae dyn wedi cael ei gyhuddo o achosi anaf difrifol drwy yrru’n beryglus mewn cysylltiad â’r gwrthdrawiad. 

Fe ymddangosodd Harley Whiteman, 19 oed o Hirwaun, yn Llys Ynadon Caerdydd ddydd Sadwrn wedi’i gyhuddo o achosi anaf difrifol drwy yrru’n beryglus a methu â darparu prawf i’w ddadansoddi.

Mae’n cael ei gadw yn y ddalfa a bydd yn ymddangos mewn gwrandawiad arall yn Llys y Goron Merthyr fis nesaf.

Mae’r heddlu’n parhau i ymchwilio i’r gwrthdrawiad ac yn apelio am dystion a lluniau neu luniau camera cerbyd o’r Ford Fiesta brown oedd yn cael ei yrru o amgylch ardal Hirwaun cyn y gwrthdrawiad.

Mae’r llu yn annog unrhyw un sydd â rhagor o wybodaeth i gysylltu gan ddyfynnu’r cyfeirnod 2400069631.