Mae menyw 25 oed wedi ei harestio yn dilyn marwolaeth menyw arall ym Maesteg.

Cafodd swyddogion eu galw ychydig cyn 07.10 fore dydd Mercher yn dilyn adroddiad o bryder am les menyw mewn cyfeiriad ym Mynydd Glas, Caerau.

Daeth cadarnhad bod menyw 44 oed wedi marw yn y fan a’r lle ac mae ymholiadau’n parhau i ganfod union achos y farwolaeth sy’n anesboniadwy ar hyn o bryd.

Mae'r fenyw sydd wedi ei harestio yn adnabod yr unigolyn a fu farw, ac mae’n parhau yn y ddalfa tra bod ymholiadau’n parhau.

Mae teulu’r fenyw sydd wedi marw wedi cael gwybod am y farwolaeth ac mae swyddogion arbenigol yn darparu cymorth iddyn nhw.

Bydd presenoldeb cynyddol gan yr heddlu yn yr ardal tra bod ymchwiliadau i'r digwyddiad yn parhau.