![Andrew Jenkins](https://ncms.s4c.org.uk/sites/default/files/styles/newyddion_large_square_1000x1000_/public/2024-01/Screenshot%202024-01-27%20at%2010.14.33.png?itok=Xm79Prhn)
Traitors: A lwyddodd y Cymro Andrew Jenkins i ennill y £100,000?
Mae ail gyfres o’r rhaglen teledu boblogaidd The Traitors wedi dirwyn i ben, ond a lwyddodd Andrew Jenkins i ennill y £100,000?
Roedd Andrew Jenkins o Donysguboriau, ger Llantrisant, yn chwarae rôl y bradwr yn y gyfres, a hynny ochr yn ochr â Harry Clark o Slough, yn Berkshire.
Ond ni lwyddodd y Cymro i gipio’r arian nos Wener, ac fe ddaeth yn pedwerydd allan o’r pump a wnaeth gyrraedd y ffeinal.
![Andrew Jenkins](https://ncms.s4c.org.uk/sites/default/files/styles/newyddion_large_square_1000x1000_/public/2024-01/Screenshot%202024-01-27%20at%2010.14.33.png?itok=Xm79Prhn)
Harry Clark, ei gyd-fradwr, cafodd ei goroni'r enillydd y gyfres BBC, sy'n cael ei chyflwyno gan Claudia Winkleman, gan gipio’r wobr derfynol o £95,150.
Cafodd y gŵr ifanc ei enwi’n fradwr ar ddechrau’r gyfres, ag yntau wedi llwyddo i fradychu ei gyd-chwaraewyr i gyd.
Roedd Mr Clark eisoes wedi dweud y byddai’n “100% yn hapus” pe bai’n fradwr yn y gyfres, gan ddweud yr oedd yn “ysu i wneud.”
![Harry Clark](https://ncms.s4c.org.uk/sites/default/files/styles/newyddion_large_square_1000x1000_/public/2024-01/Screenshot%202024-01-27%20at%2009.38.24.png?itok=cJtAigst)
Daeth yn ffrindiau agos gyda Mollie Pearce trwy gydol y gyfres, ac mi oedd hi yn ei dagrau wedi iddi golli allan ar yr arian pan gafodd wybod bod Mr Clark yn fradwr.
Roedd y ddau wedi pleidleisio i gael gwared â Jaz Singh, oedd yn ‘ffyddlon’, gan arwain at Harry Clark yn ennill y gyfres a’r arian i gyd.
Daeth y milfeddyg, Evie Morrison, yn bumed yn y gyfres wedi iddi gael ei hanfon adre’ gan ei chyd-chwaraewyr ar ddechrau’r rhaglen olaf.
Mae'r BBC eisoes wedi dweud fod trydedd gyfres o'r rhaglen wedi'i gomisiynu, ac yn gwahodd darpar ymgeiswyr i roi eu henwau ymlaen i gymryd rhan.