Bydd Casnewydd yn herio Manchester United ddydd Sul wrth iddyn nhw geisio cyrraedd pumed rownd Cwpan yr FA.

Bydd Rodney Parade yn orlawn wedi i docynnau gwerthu allan o fewn munudau iddynt fynd ar werth yn gynharach yr wythnos hon.

Manchester United, sydd wedi ennill y gystadleuaeth ar 12 achlysur, bydd yn ceisio atal Casnewydd rhag cyrraedd y pumed rownd am y drydedd tro yn eu hanes.

Mae'r Alltudion yn 16eg yn Adran Dau ar hyn o bryd, ac fe hawliodd eu lle yn y bedwaredd rownd gyda buddugoliaeth 3-1 dros Eastleigh ar yr ail gynnig.

Mae United yn wythfed yn yr Uwch Gynghrair ac enillon nhw yn erbyn Wigan Athletic yn y drydedd rownd.

Fe wnaeth Casnewydd arwyddo cyn-chwaraewr dan 21 Cymru, Luke Jephcott ddydd Mercher, a fydd yn ategu at opsiynau Graham Coughlan yn y safleoedd ymosod.

Bydd prif sgoriwr y clwb Will Evans yn gobeithio ychwanegu at eu goliau'r tymor hwn, ond ni fydd yn hawdd yn erbyn un o dimoedd mwyaf ym myd pêl-droed.

'Gwefr'

Bydd chwaraewr canol cae Casnewydd, Scot Bennett yn chwarae ei 350fed gêm i'r clwb.

Yn gefnogwr brwd Manchester United, mae'n edrych ymlaen at yr ornest.

“I mi, dyma’r gêm fwyaf y byddai wedi chwarae ynddi yn fy amser yma. Cefnogais Manchester United fel plentyn ac maen nhw'n yn un o dimau mwyaf y byd.

"Roedd cael herio Man City a Tottenham o’r blaen yn enfawr i’r clwb, a hyd yn oed Caerlŷr hefyd, ond dwi’n meddwl bod hwn yn gam i fyny.

“Mae hi wedi bod yn wythnos gadarnhaol iawn yn dilyn y canlyniadau diweddar. Fe aethon ni i mewn i gêm Eastleigh yn chwilio am gyfres o ganlyniadau positif ac fe wnaethon ni lwyddo i wneud hynny, felly gallwch chi weld yr wythnos hon bod yna wefr o gwmpas y grŵp cyn dydd Sul.

“Fe allwn ni bendant gymryd llawer o hyder o’r gemau diwethaf.

“Dydyn ni ddim yn chwarae ddydd Sul dim ond i gymryd rhan, rydyn ni'n mynd allan i geisio ennill.

“Rydyn ni eisiau perfformio ac rydyn ni eisiau parhau â’n rhediad da.”

Caru'r cwpan

Mae gan Gasnewydd hanes llewyrchus yng Nghwpan yr FA ac wedi curo nifer o dimoedd mawr yn y gorffennol.

Roedd eu rhediad gorau yn nhymor 2018/19 pan wnaethon nhw gyrraedd y bumed rownd.

Dim ond ddwywaith y mae'r clwb wedi gwneud hynny yn eu hanes, a'r tro blaenorol oedd yn 1950, gan golli i Portsmouth o flaen torf o 48,000 - oedd yn record ar y pryd yn stadiwm Fratton Park.

Yn nhymor 2018/19 fe wnaethon nhw guro Wrecsam 4-0 yn Rodney Parade yn dilyn gêm ddi-sgôr ar y Cae Ras.

Eu gwobr oedd gêm gartref yn erbyn Caerlŷr yn y drydedd rownd.

Cafodd seddi dros dro eu hychwanegu yn y stadiwm fel bod mwy yn gallu eu gwylio, ac roedd goliau gan Jamille Matt a chic o'r smotyn gan Padraig Amond yn ddigon i sicrhau buddugoliaeth hanesyddol i'r clwb.

Image

Middlesborough oedd y gwrthwynebwyr yn y rownd nesaf ac yn dilyn gôl munud olaf gan Matthew Dolan i unioni'r sgôr, roedd Casnewydd gartref yn yr ail gymal i geisio sicrhau buddugoliaeth a'u lle yn y rownd nesaf.

2-0 oedd y sgôr yn y gêm honno, a'r wobr oedd gêm yn erbyn pencampwyr Lloegr, Manchester City yn Rodney Parade ym mis Chwefror.

Yn anffodus i'r Alltudion, fe ddaeth eu rhediad yn y gwpan i ben wedi colled o 4-1 yn erbyn y tîm a wnaeth ennill y gystadleuaeth y flwyddyn honno.

Fe wnaeth Casnewydd gofnodi rhediad i'w gofio'r flwyddyn cynt, gyda dau ganlyniad campus yn erbyn timau o gynghreiriau uwch.

Yn dilyn buddugoliaethau yn erbyn Walsall a Chaergrawnt, Leeds oedd y gwrthwynebwyr yn y drydedd rownd yn Rodney Parade.

Wedi gôl gynnar gan Leeds fe wnaeth Casnewydd unioni'r sgôr wedi 76 munud cyn i'w hymosodwr Shawn McCoulsky benio'r bêl i gefn y rhwyd gyda munud yn unig i fynd.

Tottenham Hotspur oedd y tîm ddaeth i Rodney Parade ar 27 Ionawr, a'r seddi ychwanegol yno eto fel bod y dorf yn fwy na'r arfer.

Image

Padraig Amond peniodd Casnewydd ar y blaen wedi 38 munud, ac roedd yn rhaid i Tottenham aros tan 82 munud o chwarae cyn i Harry Kane unioni'r sgôr a sicrhau bod ail gêm yn cael ei chwarae yn Wembley, cartref Spurs ar y pryd.

Fe ddaeth rhediad yr Alltudion i ben yno, ond roedd eu cefnogwyr wedi mwynhau gweld eu clwb yn brwydro gyda mawrion pêl-droed Lloegr yng nghartref ysbrydol y gystadleuaeth.

Ai Manchester United fydd y tîm nesaf i golli yn erbyn Casnewydd yng Nghwpan yr FA? 

Llun: Asiantaeth Huw Evans