![newyddion](https://ncms.s4c.org.uk/sites/default/files/styles/newyddion_large_square_1000x1000_/public/2023-12/iwan%20trefor.jpg?itok=ryIu5iGt)
'Angen ymrwymiad ariannol hir dymor' i fynd i’r afael â’r prinder tai cenedlaethol
![Newyddion S4C](https://ncms.s4c.org.uk/sites/default/files/2021-03/newyddion-S4C_0.png)
'Angen ymrwymiad ariannol hir dymor' i fynd i’r afael â’r prinder tai cenedlaethol
Mae angen i Lywodraeth Cymru roi ymrwymiad ariannol hir dymor i gymdeithasau tai Cymru os am wir fynd i’r afael â’r prinder cenedlaethol.
Yn ôl Prif Weithredwr cymdeithas dai Adra yn y gogledd, dim ond blwyddyn o sicrwydd ariannol sydd i’w grant tai cymdeithasol.
Mae’r "diffyg ymrwymiad" yn golygu nad oes modd buddsoddi mewn cynlluniau mawr hir dymor a hynny’n dwysau’r prinder, yn ôl Iwan Trefor.
Mae Llywodraeth Cymru yn dweud bod awdurdodau lleol "wedi derbyn £12.5m i atal digartrefedd eleni” a bod yr amgylchiadau yn rhai heriol.
Mae Adra wrthi’n gorffen stad newydd o 17 o dai eco gyfeillgar at ddibenion rhent cymdeithasol yng nghanol Caernarfon.
Mae’r cynllun yn gobeithio cadw biliau tenantiaid yn isel gyda phaneli solar a phwmpiau gwres wedi eu gosod ym mhob cartref.
Ond un cynllun yw hwn ac mae'’r galw yn genedlaethol yn enfawr.
Cyfuniad o ffactorau, gan gynnwys y broses gynllunio, sy’n dal cymdeithasau tai yn ôl, medd y Prif Weithredwr, ond mae hefyd am weld sicrwydd ariannol.
“Be ‘da ni angen ydi’r ymrwymiad tymor hir," medd Iwan Trefor.
“Yn enwedig o ran cyllid...fydde’n galluogi i ni gynllunio ac i roi cynlluniau ar waith”
“Ar hyn o bryd mae’r ymrwymiad ar gyfer y flwyddyn nesaf yn unig ar gyfer y grant tai cymdeithasol a phe bai'r ymrwymiad am bum mlynedd neu 10 mlynedd, mi fydde’n rhoi sicrwydd a hyder i ni gynllunio nifer mwy o gynlluniau ar draws gogledd Cymru fel hyn”.
![newyddion](https://ncms.s4c.org.uk/sites/default/files/styles/newyddion_large_square_1000x1000_/public/2023-12/iwan%20trefor.jpg?itok=ryIu5iGt)
Mae’r prinder tai rhent i’w deimlo ar draws Cymru ac mae Dafydd Roberts, sy’n 21, a’i bartner Nick Martin, yn teimlo hynny wrth geisio canfod cartref newydd.
“Does dim digon o dai i fyw ynddyn nhw a rhentio preifat wedi mynd yn ddrud hefyd," meddai.
“Ti’n sôn am £800/£900 o leiaf ar rhent y mis ac ma hynny jest rhent.
“O ran tai cymdeithasol, mae’r list mor fawr a da chi’n aros am flynyddoedd.”
Yn ôl Dafydd, mae’r broses a’r siom o beidio â sicrhau tŷ hefyd yn cael effaith emosiynol.
Mae ffigyrau diweddaraf Llywodraeth Cymru yn rhoi darlun clir o maint y broblem hefyd, a’r nifer o bobl sy’n byw mewn llety dros dro gan eu bod wedi eu cofrestru’n ddigartref ar eu huchaf erioed.
Ym mis Medi 2020, roedd 4,048 o bobl drwy Gymru yn byw mewn llety dros dro, sy’n gyfuniad o bobl yn aros mewn Airbnb, gwestai, hostel neu stoc breifat.
Ym mis Medi 2023, mae’r ffigwr yna wedi cynyddu i 11,228 a 3,409 o rheini yn blant.
Yng Ngwynedd, mae'r cyngor wedi derbyn 123 o ffurflenni cais am dai ym mis Hydref 2023 yn unig.
Roedd 1,000 yn fwy o e-byst i'r cyngor hefyd yn gwneud ymholiadau - cyfanswm o 3,000 i gyd.
'Argyfwng'
Dywedodd llefarydd fod y sefyllfa "costau byw, cynydd cyfraddau llog a phrinder stoc" yn dwysau'r "argyfwng".
Mewn datganiad, fe ddywedodd llefarydd ar ran Llywodraeth Cymru fod mwy na 42,500 o bobl wedi derbyn cefnogaeth ers Mawrth 2020 drwy lety dros dro.
“Mae’n bwysig cofio niferoedd heddiw mewn cyd-destun yr her enfawr yr ydym yn ei wynebu.
“Ein ffocws o hyd yw atal hyn a cheisio sicrhau nad yw pobl yn gorfod troi at lety dros dro."