Mae’r “dirgelwch hynafol” ynglŷn â pham fod yfed gwin coch achosi cur pen wedi ei ddatrys, yn ôl gwyddonwyr. 

Yn wahanol i gur pen all godi'r bore ar ôl yfed alcohol, fe all gwin coch achosi cur pen mewn cyn lleied â 30 munud a hynny ar ôl yfed gwydraid bychan yn unig. 

Yn ôl gwyddonwyr yn nhalaith Califfornia, gwrthocsidydd naturiol sydd wrth wraidd y boen all arwain at gur pen. 

Mae gwin o ardaloedd heulog iawn yn fwy tebygol o gynnwys y gwrthocsidydd quercetin medd y gwyddonwyr. 

Dywedodd Morris Levin, un o awduron y gwaith ymchwil o Brifysgol Califfornia eu bod “gam yn agosach” at esbonio’r “dirgelwch.”

“Pan mae pobl yn yfed gwin sy’n cynnwys ychydig bach o quercetin yn unig, maen nhw’n datblygu pen tost, yn enwedig os ydynt yn debygol o ddioddef â phen tost neu meigryn yn barod,” meddai. 

“Y cam nesaf yw profi pobl sy’n dioddef gyda’r math yma o ben tost.” 

Y wyddoniaeth 

Mae quercetin yn fath o bigment mewn planhigion, ac mae’n rhoi lliw i ffrwythau a llysiau. 

Mae’r gwrthocsidydd hefyd yn bresennol mewn rhai mathau o de, cocoa a grawnwin. 

Ond unwaith iddo gael ei gyfuno gyda gwin coch, mae’n gallu amharu ar allu unigolion i brosesu’r alcohol, meddai’r gwaith ymchwil newydd.

Dywedodd yr Athro Emeritws Andrew Waterhouse o adran dyfu gwin y brifysgol: “Pan mae’n mynd i mewn i’ch llif gwaed, mae eich corff yn ei drawsnewid i ffurf wahanol o’r enw quercetin glucuronide.

“Yn y ffurf honno, mae'n rhwystro metaboledd alcohol,” meddai.