Elfyn Evans yn arwain Rali Japan

17/11/2023

Mae’r Cymro Elfyn Evans yn arwain Rali Japan ar ôl y diwrnod cyflawn cyntaf ddydd Gwener.

Fe ddechreuodd y rali gydag un cymal ddydd Iau ac yna wyth cymal ddydd Gwener.

Mae Evans ar y blaen o 1’49.9 yn erbyn Sébastien Ogier o Ffrainc yn yr ail safle.

Mae wyth cymal i’w gyrru ddydd Sadwrn gyda’r rali yn dod i ben yn dilyn chwe chymal ddydd Sul.

Dyma rali olaf y flwyddyn ac fe fydd ennill y rali yma yn cryfhau safle Evans yn ail ym mhencampwriaeth y byd tu ôl i Kalle Rovanperä o’r Ffindir sydd eisoes wedi ei goroni’n bencampwr.

Mae Evans wedi serennu er gwethaf yr amodau gwlyb trwy’r coed.

Dywedodd Evans: “Cawsom amodau eithafol y bore ‘ma wnaeth pethau’n eithaf heriol yn enwedig y dŵr ar y ffordd. Roedd llai o law yn y prynhawn ond roedd dal yn heriol i addasu i’r amodau oedd yn sychu ar ôl y bore eithafol.”