Mae Bwrdd Iechyd Prifysgol Betsi Cadwaladr wedi cyhoeddi mai Carol Shillabeer yw eu prif weithredwr newydd.

Cafodd Ms Shillabeer ei phenodi yn Brif Weithredwr dros dro ym Mai 2023 a bydd yn dechrau yn swyddgogol yn y rôl yn barhaol yn y flwyddyn newydd.

Mae ganddi brofiad ym maes iechyd fel Cadeirydd Rhaglen Frechu COVID-19 Cymru, a bu'n Brif Swyddog Gweithredol yn GIG Cymru ar gyfer Iechyd Meddwl, Iechyd Menywod, a than yn ddiweddar, Gofal Cymunedol a Gofal Cymhleth. 

Dywedodd y bwrdd iechyd bod y penodiad yn "arwain at ddilyniant ac yn cynnal deinameg newydd i weithio tuag at sicrhau bod y Bwrdd Iechyd yn symud oddi wrth fesurau arbennig ac yn datblygu cynlluniau uchelgeisiol a'u gwireddu ar gyfer y dyfodol."

Ddechrau'r flwyddyn, cafodd bwrdd iechyd y gogledd ei osod dan fesurau arbennig unwaith eto a chamodd nifer o aelodau'r bwrdd rheoli o’r neilltu.

Daeth yr ymddiswyddiadau lai nag wythnos wedi i adroddiad damniol gan Archwilydd Cyffredinol Cymru ddweud fod problemau ar frig Bwrdd Iechyd Betsi Cadwaladr yn “berygl sylfaenol” i allu’r bwrdd i weithio’n effeithiol.

Dywedodd y Gweinidog Iechyd a Gwasanaethau Cymdeithasol Eluned Morgan ar y pryd bod ganddi "bryderon difrifol am berfformiad y bwrdd."

'Heriau sylweddol'

Wrth ymateb i'w phenodiad i'r swydd yn barhaol, dywedodd Carol Shillabeer ei bod hi yn cydnabod bod y bwrdd iechyd yn wynebu heriau a bod angen "creu'r arweinyddiaeth a diwylliant cywir" i oresgyn yr heriau.

"Mae'n bleser ac yn anrhydedd cael fy mhenodi fel Prif Weithredwr Bwrdd Iechyd Prifysgol Betsi Cadwaladr. 

"Yn y cyfnod byr yr ydw i wedi bod yma, rydw i wedi gweld ymrwymiad cryf gan gydweithwyr a phartneriaid fel ei gilydd i wneud gwelliannau ac i ddarparu'r gwasanaethau y mae pobl Gogledd Cymru yn eu disgwyl a'u haeddu.

"Mae llawer o newidiadau wedi cael eu gwneud yma dros y blynyddoedd diwethaf ac rydw i'n hyderus y byddwn yn creu'r arweinyddiaeth a'r diwylliant cywir i ddarparu'r sefydlogrwydd a'r hyder sydd arnom eu hangen i fynd â'r sefydliad i'r cyfeiriad cywir.

"Rydw i'n gwybod ein bod ni'n wynebu heriau sylweddol ac rydw i'n ymrwymedig i gydweithio â staff, partneriaid a chymunedau er mwyn ein helpu i'w goresgyn gyda'n gilydd wrth i ni symud ymlaen.

Ychwanegodd Dyfed Edwards, Cadeirydd Bwrdd Iechyd Prifysgol Betsi Cadwaladr: "Rydw i'n hynod falch bod Carol wedi penderfynu derbyn y rôl fel ein Prif Weithredwr ac rydw i am ei chroesawu hi at y Bwrdd Iechyd ar sail barhaol.

"Rydw i wedi cael y cyfle i weithio gyda Carol ers mis Mai ac rydw i'n credu bod ei phrofiad eang o arweinyddiaeth, datblygu sefydliadol a gweithio mewn partneriaeth yn golygu mai hi yw'r unigolyn cywir i sicrhau bod y Bwrdd Iechyd yn gallu bod yn y sefyllfa y dylai fod ynddi.

"Mae Carol eisoes wedi cael effaith sylweddol ers ymuno â ni dros dro ac mae'r penodiad hwn yn rhoi'r sefydlogrwydd sydd ei angen arnom er mwyn parhau i roi gwelliannau ar waith i'n cymunedau, ein staff a'n partneriaid."