Bydd Israel yn dechrau gweithredu “seibiau dyngarol” pedair awr yng ngogledd Gaza bob dydd er mwyn caniatáu i bobol ffoi, meddai’r Tŷ Gwyn yn Washington.

Mae llefarydd ar ran yr Arlywydd Biden wedi galw’r  symudiad yn gam i'r cyfeiriad cywir a dywedodd fod yr Unol Daleithiau eisiau i'r seibiau barhau cyhyd ag y bo angen.

Fe fydd y saib dyngarol cyntaf yn cael ei gyhoeddi heddiw ac mae Israel wedi ymrwymo i gyhoeddi amser pob ffenestr o leiaf dair awr ymlaen llaw, meddai.

Dyw America dal ddim yn cefnogi cadoediad yn Gaza ar hyn o bryd, meddai'r llefarydd.

Mae gweinyddiaeth Biden wedi sicrhau ail lwybr i  bobl gyffredin  ffoi rhag ymladd, meddai.

Ychwanegodd mai nod yr Unol Daleithiau yw gweld o leiaf 150 o lorïau dyngarol yn mynd i mewn i Gaza bob dydd.