Mae Heddlu'r Alban yn dweud bod wyth o’u swyddogion wedi eu hanafu ar ôl trais “ffiaidd” ar noson tân gwyllt.

Roedd tua 100 o bobl ifanc wedi ymgasglu ar Hay Avenue yn Niddrie, Caeredin toc cyn 17.00 ddydd Sul.

Roedd tua 50 o‘r rheini yn gyfrifol am anelu tân gwyllt a bomiau petrol at swyddogion, meddai’r heddlu.

Dywedodd y Prif Gwnstabl Cynorthwyol Tim Mairs bod y trais yn “ddigynsail”.

“Mae lleiafrif o unigolion wedi bod yn gyfrifol am anhrefn annerbyniol a ffiaidd sydd wedi dychryn cymuned ac anafu swyddogion," meddai.

Ychwanegodd bod pobl ifanc yn cael “eu hannog” gan oedolion i dargedu swyddogion.

'Siomedig'

Rhybuddiodd arweinydd Cyngor Caeredin, Cammy Day, y byddai’r rheini oedd yn gyfrifol yn cael eu herlyn.

“Roedd y golygfeydd yn Niddrie heno yn arswydus,” meddai.

“R’yn ni wedi bod yn gweithio trwy gydol y flwyddyn i atal y trais sy’n gysylltiedig â Noson Tân Gwyllt felly mae’n hynod siomedig gweld lleiafrif o bobl yn ymddwyn fel hyn."

Roedd trais yn erbyn yr heddlu yn Dundee hefyd wrth i ddau gerbyd gael eu bwrw â briciau.

Ddydd Mawrth bu’n rhaid i heddlu ymyrryd yn y ddinas wedi adroddiadau fod plant mor ifanc â 10 oed yn cynnau tân gwyllt.

Llun gan Heddlu yr Alban / PA.